Отырысқа жұмыс тобының мүшелері, мүдделі мемлекеттік органдар мен ұйымдардың өкілдері және Біріккен Ұлттар Ұйымы Даму бағдарламасының (БҰҰДБ) Қазақстандағы өкілі қатысты.
Пандемияға байланысты Қазақстанның БҰҰ Нәсілдік кемсітушілікті жою жөніндегі комитетінде баяндама жасау мерзімі өзгертіліп, 2022 жылы Женевада өткізу жоспарланған болатын.
Жұмыс тобының жетекшісі – Ақпарат және қоғамдық даму вице-министрі Серік Егізбаев жиынға қатысушыларды БҰҰ Нәсілдік кемсітушілікті жою жөніндегі комитетінің баяндама мазмұнына қатысты комментарийлерін қайта талқылауға шақырды.
«БҰҰ Комитеті ұсынымдарының басым бөлігін Қазақстан орындады. Сонымен қатар мұқият зерттеуді қажет ететін бірнеше ұсыныс бар. Мысалы, дискриминацияға қарсы жеке заңнаманы әзірлеу. Бұл мәселе түрлі елдің тәжірибесі арқылы одан әрі бірлескен зерттеуді талап етеді», деді Серік Егізбаев.
Сонымен қатар БҰҰДБ-ның Қазақстандағы ұлттық сарапшысы БҰҰ Комитетінің қорытынды ескертулерін жою бойынша мүдделі мемлекеттік органдармен және ұйымдармен жүргізіліп жатқан жұмыстар туралы айтып берді.
Естеріңізге сала кетейік, 1998 жылы Қазақстан Нәсілдік кемсітушіліктің барлық нысанын жою туралы Халықаралық конвенцияны ратификациялаған болатын. Конвенция нормаларын орындау шеңберінде Үкімет қаулысымен «Нәсілдік кемсітушіліктің барлық нысанын жою туралы халықаралық конвенцияны Қазақстан Республикасының орындауы туралы сегізінші-оныншы жиынтық мерзімді баяндамасы» бекітілген.
Баяндаманы Ақпарат және қоғамдық даму министрлігі жанындағы Ведомствоаралық жұмыс тобы барлық мүдделі мемлекеттік органның қатысуымен әзірлеп, онда 2014-2017 жылдар аралығындағы есептік кезеңде Қазақстанның Конвенция баптарын іске асыруы жөніндегі ақпарат қамтылған.
Дайындаған
Кәрібай МҰСЫРМАН,
«Egemen Qazaqstan»
