Экономика • 22 Шілде, 2021

Туризм өңір дамуына ықпал етеді

20 рет көрсетілді

Қазақстанда ұйымдастырылған туризмді дамыту қажет. Өкінішке қарай, ұйымдастырылмаған, жаппай туризм салдарынан туристер Қазақстандағы демалыс орындарына залалын тигізіп жатыр. Бұл туралы «Атамекен» ұлттық кәсіпкерлер палатасында өткен тұрақты туризмді дамыту жөніндегі «Мемлекеттік құрылымдармен диалог» тақырыбындағы онлайн конференцияда айтылды.

Қымбат ТОҚТАМҰРАТ

«Атамекен» ҰКП Басқарма төрағасының орынбасары Юлия Якупбаеваның айтуынша, Палата «Kazakh Tourism» ҰК» АҚ және Мәдениет және спорт министрлігімен бірлесіп, жол картасын құрған. Соның аясында тұрақты туристік өнімдерді, эко, агротуризмді дамытуға, қонақүйлерді ашу тәжірибесін кеңейтуге жол ашылмақ. Осылайша, өңірдің экономикасын өркендетуге, жұмыс орындарын құруға және жергілікті тұрғындарға қосымша табыс көзі болатын туризмді жетілдіруге көңіл бөлінеді.

Спикердің айтуынша, қолданыстағы және нарықта жаңадан пайда болып жатқан туристік өнімдер кәдесый өнімін сатып алу, ұлттық және өңір үшін ерекше тағамдардың дәмін тату, әдемі фотосурет жасауды қамтуы тиіс. Ол үшін ҰКП мамандары туристік өнімді қалыптастыру үдерісіне, туристік маршрут қалыптасып жатқан орынға шағын бизнесті, соның ішінде өңірлік кәсіпкерлерді тарту қажет деп санайды. «Өңірдегі шағын бизнес өнімдер тізбесін кеңейтуге жергілікті тұрғындар да қатысуы керек. Мысалы, жылқыларды жалға беру, туристерді егістіктен көкөніс жинауға қызықтыру, қолөнер бойынша шеберлік сабақтар өткізу, ұлттық тағамдар ұсыну сынды шараларды ұйымдастыру керек. Қолөнер өнімдері қазақтың ұлттық қолөнерін әлемге танытып қана қоймай, жекелеген өңірдің танылуына және ілгерілеуіне де ықпал етері анық», дейді Ю.Якупбаева.

Конференция аясында қатысушылар экоресурстарды ұтымды пайдалану, жұмыссыздық пен кедейлікпен күрес, қазіргі заманғы арзан туризм және туристік өнімдердің сапасын жақсарту сынды мәселелерді де талқылады.

«Атамекен» ҰКП баспасөз қызметі берген мәлімет бойынша, Ұлттық кәсіпкерлер палатасы биыл Мәдениет және спорт министрлігі және «Kazakh Tourism» ҰК» АҚ-мен үшжақты келісімшарт жасасқан. Осы құжат бойынша объектілерді абаттандыру бойынша нақты шараларды анықтау үшін қолданыстағы туристік маршруттарды диагностикалау; агротуризмді дамыту бойынша оқыту семинарларын өткізу; экотуризмді дамыту үшін қонақүйлер санын арттыру мақсатында тренингтер өткізу; қолөнер түрлерін сақтау және ілгерілету тәсілдерін пысықтау сынды шараларды ұйымдастыру жоспарланған.

Күннің маңызды және өзекті жаңалықтарын «Егемен Қазақстан» телеграм каналынан оқыңыз