Ақтөбе облысы 9 шілдеден бастап коронавирус инфекциясының таралуы бойынша «қызыл аймақтың» қатарында тұр. Пандемия басталғалы өңірде КВИ-мен 14 142 адам ауырып шықты. Бүгінде қауіпті індетке шалдыққан 2 490 науқастың 503-і стационарлық, 1 987-і амбулатуралық режімде ем алып жатыр.
Осы жылдың басынан бері 294 жүкті әйел коронавирус инфекциясын жұқтырып дәрігерлік көмекке жүгінді. Бүгінде провизорлық орталықта 57 жүкті келіншек жатыр. Айта кету керек, былтыр сәби күтіп жүрген 15 келіншек осы індеттің асқынуынан көз жұмған болатын.
«Қызыл аймаққа» енген күннен бастап, індетке шалдыққандар саны артуы мүмкін деген болжаммен өңірде 24 инфекциялық стационар әзірленді.
«Дәл қазіргі кезде 18 стационарда науқастар ем алып жатса, резервте 6-уы дайын тұр. Осы инфекциялық стационарларда дайындалған 3 603 кереуеттің 401-і – реанимациялық кереуеттер. 18 шілдеде бір тәулікте КВИ-мен ауырған 159 жағдай, ал 21 шілдеде 192 жағдай тіркелді (оның ішінде ауру симптомдары бар – 134)», деді облыстық денсаулық сақтау басқармасының басшысы Рүстем Исаев.
Сондай-ақ соңғы күннің мәліметіне қарағанда, Шалқар, Темір, Мұғалжар аудандарында коронавирус жұқтырғандар саны айтарлықтай көбейген. Соның ішінде 18 жасқа толмаған 25 бала осы жұқпалы індеттің құрығына ілініп, ауруханаға жатқызылды.
Айта кету керек, осы күнге дейін Ақтөбе облысының 206 мың 280 тұрғыны коронавирусқа қарсы екпе алды. Министр Ақтөбе облысында резервте тұрған кереуеттерді шұғыл түрде дайындап, кеңес беру-диагностикалық топтың жұмысын жасақтап, алғашқы жәрдем беру орталықтарында ахуалдық орталықтар ашуды тапсырды.
Ақтөбе облысы
