Сайлау күніне дейін әкімдікке үміткер азаматтар ауыл жұртымен жүздесіп, сайлауалды бағдарламаларымен таныстырып жүр. Жуырда Ұлан ауданы, Айыртау ауылдық округінде «Ауыл» халықтық-демократиялық патриоттық партиясы атынан түскен кандидат Дархан Төлеуханов тұрғындармен кездесу өткізді.
Айыртау ауылы Өскеменнің іргесінде болғанымен, қордаланған мәселесі баршылық. Атап айтсақ, жайылымдық, шабындық жері тар. Көшелері жөндеу көрмеген, жарық тартылмаған. Ауызсу мәселесі және айтылып келеді. «Ауыл» партиясы атынан сайлауға түсіп отырған Д.Төлеуханов Айыртауда туып-өскендіктен, аталған проблемаларды бес саусағындай біледі. Ауылдың мәдениет үйіне жиналған айыртаулықтар да, сырттан келген басшыдан гөрі ауыл азаматы тізгінді қолға алса деген тілектерін айтып жатты.
Жас үміткер Дархан Төлеуханов жоғары оқу орынын тәмамдаған соң туған жеріне қайтып оралған. Содан бері ауылда дзюдо мен қазақша күрестен жаттықтырушы. Жастарды саламатты өмірге баулыды. Спортта өзінің жеткен жетістіктері де аз емес. Одан бөлек, аудандағы қоғамдық жұмыстарға белсенді қатысып жүретін. «Жас келсе іске» деуші еді ғой, енді халық қолдап жатса, Дархан Кәдірұлы туған ауылы үшін қызмет етуге дайын.
– Ауылдағы ауызсу, көшелерді жөндеу, жарықтандыру сияқты мәселелерді жақсы білемін. Қазірдің өзінде төрт көшеге орташа жөндеу жұмыстары жүргізіліп жатыр. Алдағы күндері асфальтын төсейді. Ол үшін 120 млн теңге қаржы бөлінген. Жөндеу жұмыстары төрт көшемен шектелмейді, келер жылдары да жалғасын таба бермек. Айыртау мен Қанай арасындағы жол да жаңартылады. Сонымен қатар жайылым және шабындық жерлер жеткіліксіз, – деп ауылдағы жағдайды жақсы білетінін аңғартты Дархан Төлеуханов. Оларды шешу жолдары сайлауалды бағдарламасында қарастырылған көрінеді.
– «Ауыл» партиясы атынан облыс бойынша округ әкімдігіне 18 үміткер ұсынылды. Олардың бәрі белгіленген талаптарға сай. Солардың бірі – Айыртау ауылдық округінің әкімі лауазымына үміткер Дархан Кәдірұлы. Үміткер жалғыз емес, оның артында партия тұр. Облыста біздің партиядан 15 депутат бар. Оның үшеуі – облыстық мәслихаттың депутаттары, – деді «Ауыл» партиясы облыстық филиалы басшысының орынбасары Камал Арынханов.
Ал ауыл ақсақалы Қадылбек Сағынғановтың пікірінше, ауылдан шыққан азамат туған жері үшін жанын беріп, еңбек етеді. Бір жағынан өзіміз сайлаған соң, қандай мәселе болса да төтесінен айта аламыз деседі халық.
– Бұрын ауыл әкімін депутаттар сайлаған. Енді, міне, халық сайлайтын болды. Алайда бюджеттен қаржы бөлінбесе, ауыл әкімі жұмыс істеп жарытпайды. Айтайық дегеніміз, халық қолдағанымен, сайланған әкімді аудан әкімдігі де қолдауы керек, – десті жұрт бірауыздан.
Кездесуден кейін кандидат Дархан Төлеуханов пен сенімді өкілдері ауылды аралап, жөнделіп жатқан көшелерді көрді. Бұрын-соңды оғыр-шоғыр болып жатқан көшелерге асфальт төсеу жұмыстары жүргізіліп жатыр. Ерсілі-қарсылы ағылған техника. Шаруа қызу. Ауыл ішіндегі көпқабатты ескі үйлер де бұзылады. Ел аман, жұрт тыныш болса, жаман індет тоқтап, экономика көтерілсе, ауылдықтар да ауызбіршіліктен ажырамаса, аз уақыт ішінде Айыртаудың да айы оңынан туады. Оған сенім мол.
Айтқандай, Шығыс Қазақстан облысында сайлаудың әділ өтуі үшін 300-ден астам тәуелсіз бақылаушы қатысады. 25 шілдеде барлық сайлау учаскесінде жұмыс істейтін 300-ден астам бақылаушы арнайы курстардан өтіп жатыр.
– Бұл сайлау халықтың билікке деген сенімін, сондай-ақ биліктің өз қызметіне жауапкершілігін арттырады. Сайлау процесі ашық әрі заңға сәйкес өтуі үшін біз байқаушыларды даярлаймыз, – дейді «Партиялық емес бақылау орталығы» республикалық қоғамдық бірлестігі облыстық филиалының төрағасы Аяужан Әшімова.
Оның айтуынша, байқаушы болғысы келетіндерге қойылатын ең маңызды талап – процеске қызығушылық таныту. Егер сайлау учаскесінде байқаушылар қандай да бір бұзушылықтарды тіркеген жағдайда, олар бұл туралы Өңірлік штабқа дереу хабарлауға тиіс. Онда заңгерлер мен жаттықтырушылар одан әрі іс-қимыл жасау туралы шешім қабылдайды. Демек сайлаудың әділ өтері анық.
Шығыс Қазақстан облысы,
Ұлан ауданы
