Коронавирус • 26 Шілде, 2021

Елорданың жансақтау бөліміне вакцина алмағандар түсіп жатыр

102 рет көрсетілді

Нұр-Сұлтан қаласының жансақтау бөліміне КВИ-ға қарсы вакцина алмаған науқастар түсіп жатыр. Бұл туралы қалалық қоғамдық денсаулық сақтау басқармасының басшысы Тимур Мұратов айтты, деп хабарлайды Egemen.kz қала әкімдігіне сілтеме жасап.

Ботакөз БАҚБЕРГЕН

«Біздегі реанимациялық төсектер 84%-ға толды. Коронавирус инфекциясына қарсы екпе алмай, ауыр күйде жатқан 248 пациент бар. Оның ішінде 77 адамның жағдайы өте ауыр. Науқастардың басы-қасында жүргендіктен бұл көрсеткіш қатты алаңдатып отыр. Біз өткен жылғы ең ауыр күйге жетуге жақын қалдық», дейді басқарма басшысы.

Тимур Мұратовтың айтуынша ауыр күйде жатқандар арасында қарт кісілер ғана емес 35 жастағы науқастар да бар.

«Вирус жаңа штамдарға мутацияланып отырады. Әсіресе олар жастар арасында жиі тіркелуде. Қазір жастар да, тіпті балалар да инфекцияның ауыр күйіне ұшырай бастады. Екі-үш күн ішінде пациенттердің денсаулығы нашарлағаны соншалық, жасанды тыныс алу аппаратынсыз өмір сүре алмайтын күйге жетеді. Реанимациядағы барлық пациенттің мұндай жағдайға түсуінің себебі – вакцинадан бас тарту», деп түсіндірді Т. Мұратов.

Тимур Мұратов қала тұрғындарын уақытында вакцинациядан өтуге, осы арқылы өздерін инфекция жұқтырудан қорғауға шақырды.

«Құрметті азаматтар! Ойланып және күтіп отыратын уақыт жоқ! Қазір вакцинация алу өте маңызды, әйтпесе кеш болуы мүмкін. Бізге, яғни дәрігерлерге, КВИ-ге байланысты қайтыс болғандар статистикасын жариялау, туыстарына жақыны келмеске кеткенін айту оңай емес. Өткен жылы біз пандемияны жеңудің барлық жолын іздеген едік, ал қазір қолымызда бар, ол – вакцинация. Осы арқылы ғана біз аурудың қиын кезеңінен шыға аламыз», деп қорытындылады қалалық денсаулық сақтау басқармасының басшысы.

Күннің маңызды және өзекті жаңалықтарын «Егемен Қазақстан» телеграм каналынан оқыңыз