25 шілдеде сағат 17:39-да Күмісбеков көшесіндегі күтушінің үйінде төрт жасар бала орындықтың көмегімен терезе алды тақтайына көтеріліп, бесінші қабаттың терезесінен автокөлікке құлап түсті. Бұл кезде бала күтушісі үйде болған. Түрлі дене жарақаттарын алған бала ауруханаға жеткізілді. Анасы баласын күтушіге қалдырып, ал өзі Бурабайға демалысқа кеткені анықталды.
Сол күні сағат 19:30-да 6 жасар қыз Қосшығұлұлы көшесіндегі үйдің екінші қабатынан жертөленің күнқағарына құлап түсті. Оқиға орын алған уақытта әкесі көшеде болған.
26 шілдеде аудандық полиция бөліміне 5 жасар баланың ауруханаға жатқызылғаны туралы хабарлама келіп түсті. Тексеру барысында түнгі сағат 01:00 шамасында кішкентай бүлдіршін Кубрин көшесіндегі үйдің үшінші қабатынан құлағаны анықталды. Түрлі дене жарақаттарымен ол реанимация бөліміне жатқызылды.
Полиция ұсынған мәлімет бойынша, жыл басынан бері елордада көпқабатты үйлердің терезесінен он сегіз бала құлап, бір бала көз жұмды.
