Алтын бесік – ауыл тұрғындары Тәуелсіздік жылдарында тұңғыш рет өз басшыларын өздері таңдау мүмкіндігіне ие болып, саяси белсенділігі күрт артты. «Әкім бол, халқыңа жақын бол!» дегендей, енді ауыл әкімі тұрғындарға жақындай түседі. Жоғарыдағы басшылықтың емес, ауылдықтардың мүддесін қорғап, жергілікті жерлерде шешілмей жатқан күрмеулі мәселелердің шешім табуына күш салады. Екіншіден, осы жолғы саяси науқан барысында халық даусының маңыздылығын анық ұғындық.
Қостанай облысындағы 65 сайлау округінде болған дауыс беруге «Партиялық емес байқау орталығы» республикалық қоғамдық бірлестігі облыстық филиалының 400-ге жуық өкілі қатысты. Олардың бәрі алдын ала арнайы даярлықтан өтіп, маңызды саяси науқанның әділ әрі ашық өтуін қадағалап отырды.
Өз басым түске дейін өңірдегі сайлау учаскелерінің біразын аралап шықтым. Шалғай ауылдардағы сайлау учаскелеріндегі өкілдерімізден телефон арқылы хабар алып отырдық. Біздің байқаушылардың айтуынша, саяси науқан барысында қолданыстағы заңнаманы бұзудың ешқандай дерегі тіркелген жоқ. Бұған қоса, санитарлық-эпидемиялық талаптардың сақталуын жіті бақылап отырдық. Әр учаскедегі кабиналар арнайы санитарлық құрылғылармен сағат сайын тазартылып, әлеуметтік арақашықтық сақталуы қатаң қадағалауда болды. Облыстағы барлық сайлау учаскесінің кіреберісінде медицина қызметкерлері мен волонтерлер кезекшілік атқарып тұрды. Олардың міндеті сайлаушылардың санитайзер арқылы қол шаюын қадағалап, дене қызуын өлшеп, әр адамға медициналық қолғап, маска, қалам үлестіру болды. Маска, қолғаптармен барлық учаскелер жеткілікті түрде қамтылды.
Бұл сайлауда ауыл тұрғындарының белсенділігі ерекше болғандығын атап айтқан жөн. Мәселен, Лисаков қаласы мен Әулиекөл, Жітіқара аудандарындағы сайлау учаскелерінде ауыл тұрғындарының жартысынан астамы түске дейін-ақ дауыс беріп үлгерді. Бұл өз әкімін өзі сайлап, нағыз халықтық таңдауға қол жеткізген ауыл тұрғындарының саяси белсенділігінің айғағы болса керек.
Болат ҚАЛИЕВ,
«Партиялық емес байқау орталығы» РҚБ облыстық филиалының төрағасы
Қостанай облысы
