Осы жылы астанада «Солтүстік жотасы» карьерін одан әрі рекультивациялай отырып, құрылыс қалдықтарын жинайтын әрі өңдейтін арнайы алаң жұмысы жолға қойылады. Бұл алаңда кірпіш, асфальт, бетон қалдықтары сияқты құрылыс қалдықтарын қайта өңдейтін ұсату кешенін орнату қарастырылған. Мұнда құрылыс қалдықтарының 50%-ын қиыршық тасқа, 10-15%-ын арматураға және басқа да материалға өңдеуге болады.
Жалпы, шаһарда қоқыс өңдеу зауытын жаңғырту жұмыстары жалғасып жатыр. Бұл кәсіпорын қуатын екі есеге – жылына 250 мың тоннадан 450 мың тоннаға дейін арттыруға мүмкіндік береді. Бұған қоса қатты тұрмыстық қалдықтарды жеке жинау үшін арнайы контейнерлер, сондай-ақ құрамында сынабы бар шамдарды жинауға арналған контейнерлер орнатылды. Тұрмыстық қатты қалдықтарды өңдеу деңгейі 75%, қайталама шикізатты алу 17% көрсеткішіне жетті.
Нұр-Сұлтан әкімдігі қала экологиясын жақсарту бойынша жүйелі жұмыс жүргізуде. Соның ішінде қала аумағында рұқсат етілмеген қоқыс үйінділерін жою және болдырмау бойынша жұмыстар қолға алынған. Жыл басынан бері экологиялық полициямен бірлесіп 100-ден аса рұқсат етілмеген қоқыс орны жойылды. Полигонға 70 мың тоннадан аса қалдық шығарылды.
Қоқысты белгіленбеген орындарға жинап қойғаны және заңсыз түсіргені үшін 1000 құқық бұзушы (құрылыс ұйымдары, кәсіпкерлер және т.б.) әкімшілік жауапкершілікке тартылды. Құқық бұзушылар iKomek қызметінің арқасында жауапқа тартылады. Бірнеше рет қайталанған жағдайда құрылыс жұмысы тоқтатылады.
Елордалық қоршаған ортаны қорғау және табиғатты пайдалану басқармасының мәліметінше, жуырда Ақмола облысының Айналма жолы аумағында, сондай-ақ Байқоңыр ауданында ведомство инспекторлары апатты қоқыс үйінділері бойынша рейдтік іс-шаралар өткізді. Рейд барысында полигондар жойылды.
Өткен жылмен салыстырғанда рұқсат етілмеген қоқыс тастайтын орындар саны әкімдік тарапынан күшейтілген бақылаудың нәтижесінде 533-тен 385-ке дейін, яғни үштен бірі азайған. Биыл астанада 42 мың тоннадан астам қоқыс кәдеге жаратылып, 100-ден астам рұқсат етілмеген қоқыс үйіндісі жойылды.
Ал рұқсат етілмеген қоқыс орындары жыл сайын «Қазақстан Ғарыш Сапары» АҚ Геопорталының ғарыштық мониторингі арқылы табылып, жойылып жатқанын атап өткен жөн.
