Білім • 04 Тамыз, 2021

Мажарстанда тегін білім алады

225 рет
көрсетілді
1 мин
оқу үшін

Алдағы уақытта 200-ден астам қазақстандық Мажарстанның жетекші жоғары оқу орындарында тегін білім алады. Осы­нау мүмкіндік Білім және ғылым министрлігі мен Мажарстанның Адами ре­сурс­тар министрлігінің келі­сімдерінің нәтижесінде жүзеге аспақ. Бұл туралы БҒМ баспасөз қызметі хабарлады.

Мажарстанда тегін білім алады

«Біздің отандастарымыз Stipendium Hungaricum сти­пендиялық бағдарламасы бо­йын­ша оқиды. Бұл тізімді мажар тарапы үміткерлердің мамандық таңдауына деген ынтасына, олардың теориялық білімі мен оқудағы немесе таңдаған са­ла­сындағы жетістіктеріне сүйе­­не отырып бекітті. Сон­дай-ақ әңгімелесу кезінде канди­дат­тардың жеке қасиеттері ес­керілді», деп атап өтті Білім және ғылым министрлігі Халықаралық бағдарламалар орталығы президентінің міндетін атқарушы Данияр Мұ­қи­танов.

Стипендиаттар Мажарстанда бакалавриат, магистратура және докторантура бағдарламалары бойынша қабылдаушы тараптың есебінен оқиды. Сонымен қатар 70-тен аса адамнан тұратын резервтік тізім жасалды. Барлық үміткердің тізімі Халықаралық бағдарламалар орталығының ресми сайтында жарияланған.

Осы орайда үкіметаралық келісімдер аясында 330 қазақ­стандық әлемнің жетекші жо­ғары оқу орындарында, оның ішінде Мажарстан, Польша, Қы­тай, Украина, Словакия, Әзер­байжан және Вьетнам уни­вер­ситеттерінде тегін оқи алатынын айта кеткен жөн.

 

«Егемен-ақпарат»