![Әскери дәрігерлер көмекке келді](/media/2021/08/05/crop-12_9_788x1390_askeri-darigerler-komekke-keldi.jpg)
Қорғаныс министрлігінің баспасөз қызметі таратқан мәліметке қарағанда, стационар 150 науқасқа арналған. Бұл ретте медициналық мекемеде соматикалық патологиясы бар әскери қызметшілерді емдеу, сондай-ақ әскери-дәрігерлік және дәрігерлік-ұшқыштық сараптама жүргізу үшін 100 орын сақталады.
Қалыптасқан жағдайда әскери дәрігерлер азаматтарды госпитальға жатқызып, білікті медициналық көмек көрсету үшін қолда бар ресурстарды жұмылдырды.
– Біздің әскери госпиталь екінші эшелонға жатады. Сондықтан инфекциялық стационарға орташа ауыр және ауыр науқастар жатқызылатын болады. Жеке құрам бұған дайын. Біздің медициналық персоналдың коронавирустық инфекциямен ауыратын науқастарды емдеу ісінде тәжірибесі бар. Ол үшін бізде өкпені жасанды желдету және гемодиализ аппараттарымен жабдықталған жансақтау бөлімшесі, сондай-ақ қажетті дәрі-дәрмек бар, – деді Алматы қаласындағы Әскери клиникалық госпиталь бастығының міндетін уақытша атқарушы медицина қызметінің подполковнигі Абдували Палтушев.
Әскери госпиталь дәрігерлері өткен жылғы сәуірден бастап азаматтарға көмек көрсетуге екі рет тартылған болатын. Нәтижесінде, 1 430 адам, соның ішінде шамамен 30 пайыздай ауыр және асқынған жағдайдағы пациент емделіп шыққан.
Биылғы шілдеден бастап елордадағы Бас әскери клиникалық госпиталь коронавируспен науқастанғандарды емдеу үшін қайта жұмылдырылғанын атап өткен жөн. Алматы, Талдықорған және Үшарал қалаларындағы үш әскери-емдеу мекемесі де азаматтарды қабылдауға дайын. Аягөз, Талдықорған, Сарыөзек және Семей әскери госпитальдарында қосымша төрт инфекциялық оқшаулағыш қызмет көрсетіп тұр. ПТР-тестілеу үшін Нұр-Сұлтан мен Алматыда екі стационарлық зертхана, сондай-ақ Ақтау мен Семейде мобильді зертханалық кешендер іске қосылған.