Саясат • 06 Тамыз, 2021

Медиацияның маңызы

62 рет көрсетілді

Павлодарда «Медиация туралы» Заңның күшіне енуі­нің 10 жыл­­дығына және медиация орталығы қызметінің 5 жыл­ды­ғы­на арналған «Қоғамдық келісім мен жалпыұлттық бір­лік­ті қам­т­амасыз етудегі медиацияның рөлі» тақырыбында дөңгелек үстел өтті.

Бірыңғай медиация күні аясында өткен дөңгелек үстелдің жұмы­сына қоғамдық медиатор­лар, Павлодар облысының мемле­кет­тік органдары мен кәсіподақ­тарының өкілдері қатысты.

Отырысты ашқан Қазақстан халқы облыстық ассамблеясы хатшылығының меңгерушісі Айнұр Раисова медиаторлар жұ­мы­сының дауларды сотқа дейін­гі тәртіппен реттеудегі маңы­зын атап өтті. Ал Ақпарат және қоғам­дық даму министрлігі «Қоғам­дық келісім» РММ ҚХА құры­лым­дарымен жұмыс және жобаларды іске асыру басқармасының бас­шысы Талшын Италиева азамат­тардың сотсыз келісім практикасына жиі жүгінетінін және кәсіби медиаторлардың көмегі көбірек талап етілетінін атап өтті.

«Қазақстан халқы Ассамблея­сы қоғамдық медиаторлар институтын құру және дамыту бойынша жүйелі жұмыс жүргізуде. Бес жыл ішінде елімізде жиырма медиация кеңесі құрылды», деді ол.

Т.Италиева республикалық Медиация кеңесі өз қызметінің бес жылында  өзара ынтымақтастық ту­ралы жиырмадан астам мемо­рандумға қол қойғанын айтты. Меморандумдар Жоғарғы сот және Судьялар одағымен, Ресей Федерациясының Федералдық медиация институтымен және Ұлттық медиаторлар ұйымымен, ҚР Ұлттық денсаулық сақтау пала­тасымен, «Атамекен» ұлт­тық кәсіп­керлер палатасымен, Респуб­ликалық адвокаттар алқасымен, Республикалық нотариалдық палатамен, Қазақстанның Адам құқықтары жөніндегі уәкілімен, «Тұран-Астана»университетімен жасалған. Қазақстан халқы Ассамб­леясының қолдауымен бар­лық өңірде медиация кабинет­тері ашылып, «Қоғамдық келі­сім» КММ штатына медиация мәсе­лелері бойынша үйлестірушілер қабылданды. Бүгінгі таңда об­лыстық «Қоғамдық келісім» КММ жанында 17 медиация ка­бинеті, 346 диалогтық алаң жұ­мыс істейді», деді Т.Италиева.

Павлодар облысы аумақтық кәсіп­одақтар бірлестігінің төр­ағасы Динара Айтжанова өз сөзінде кәсіподақтар қызмет­кер­лерінің барлығы өздерінің базалық біліміне қарамастан, қыз­мет ерекшелігіне байланысты медиаторлар болып табылатынын жеткізді.

«Біздің қызметіміздің негізгі қағидаты – жұмыскерлердің құ­қықтарын қорғау. Еңбек дауларын шешу үшін құқықтық қорғау және медиативтік көмек тетігі сотқа дейін де, сотта да қолданылады. Кәсіподақтардың еңбек дауларын сотқа дейін шешуге қатысу құқығы «Кәсіптік одақ­тар туралы» Заңда бекі­тілген», деді ол.

Кәсіподақ төрағасы пандемия кезінде енгізілген шектеу­лердің ерекшеліктеріне байланысты кәсіподақтардың «Татуласу орталығы» жұмысын қашықтықтан жалғастырып, облыс азаматтарына жедел желі арқылы кеңес беруді ұйымдас­тырғанын атап өтті. Аталған желіге облыс тұрғындары құқық­тық кеңес алу және татуластыру келіссөздерін жүргізу үшін жүгіне алады. Сондай-ақ татуластыру орталығының қызметін ақпараттандыру үшін жеделхат мессенджерінде арна құрылды.

Аққулы ауданы Жамбыл ауылының 74 жастағы тұрғыны Өмірзақ Исағұлов қоғамдық медиатор ретінде ауыл тұрғындары арасындағы дауларды шешу үшін ауданның ауылдық округтерін велосипедпен аралайды. Ол атап өткендей, бұған дейін ауылдық жерлерде «халық медиаторы» – жергілікті әкім мен ардагерлер кеңесі болған еді.

«Ауыл – үлкен отбасы, онда барлығы бір-бірін жақсы біледі. Дау-жанжал туындағанда дау­герлер бірінші кезекте ауыл әкіміне баратын еді», дейді Ө.Иса­ғұлов. Оның айтуынша, медиа­цияның келуімен азаматтар арасындағы даулар қоғамдық медиаторлардың көмегімен реттеле бастаған. Ол қоғамдық медиатор ретінде беделге ие болу үшін өзіне жүгінетін ауыл тұрғындары арасында мінсіз беделге ие болу керек деп есептейді.

Дөңгелек үстел соңында бір­қатар қоғамдық медиатор мен мемле­кеттік органдардың басшы­лары азаматтарға өтеусіз құқық­тық көмек көрсету және ұйымдас­тыру бойынша жоғары кәсібилігі мен тиімді жұмысы үшін Алғыс хаттарымен марапатталды.

Бүгінгі таңда Павлодар облысында 28 медиация кабинеті жұмыс істейді. Олардың біреуі облыстық, төртеуі қалалық. Қалған жиырма үші аудан орталықтары мен ауылдық округтерде.

 

 

Соңғы жаңалықтар

Мунгияның арманы – Головкин

Кәсіпқой бокс • Бүгін, 10:35

ҚазҰУ-да Тәуелсіздіктің онкүндігі басталды

Тәуелсіздіктің 30 жылдығы • Бүгін, 09:55

Ұқсас жаңалықтар