«Мен Маңғыстау облысының әкімдігінен арнайы шот ашуды сұрадым. Онда Қазақстанның барлық бей-жай қарамайтын азаматтары мен ұжымдары қайырымдылық ретінде қаражат аудара алады. Ауыл шаруашылығы министрлігі өзінің бір күндік жалақысын Маңғыстау облысының мұқтаж фермерлеріне және жеке қосалқы шаруашылықтарына көмектесу үшін жіберуге шешім қабылдады. Басқа ұйымдар да бұл шарадан тыс қалмайды деп ойлаймын», деді Ауыл шаруашылығы министрінің міндетін атқарушы Ербол Қарашөкеев.
Ол құрғақшылықтан зардап шеккен аймақ басшыларына қаражат жинау, жемшөп пен дәнді дақылдарды дайындау жұмыстарын жандандыруды тапсырды.
Қарашөкеевтің айтуынша, Батыс Қазақстан облысында еріктілер 22 вагон шөп жинап жөнелткен және жөнелтуге тағы 25 вагон дайындаған. Павлодар облысында 20-ға жуық вагон жем жиналған. Алматы облысында 15 вагонға шөп тиелген, тағы 50-ге жуық вагон тиеліп, жөнелтуге дайын.
«Жергілікті әкімдік көмегі станцияларда тиеу-түсіру жұмыстарын ұйымдастыру барысында және көмекке мұқтаждар туралы ақпарат жинау кезінде қажет. Аймақтағы кәсіпкерлермен келісіп, еріктілер жинайтын жемді арзан бағада тасымалдауға қаржы табайық», деп сұрады Ауыл шаруашылығы министрінің м.а.
