Аймақтар • 12 Тамыз, 2021

Балалар үйінің қызметкерлері 67 миллион теңге жымқырған

Алматыда балалар үйінің директоры мен әлеуметтік педагог сотталды, деп хабарлайды Egemen.kz zakon.kz-ке сілтеме жасап.

Алматы облысы білім басқармасының «Алматы облыстық №1 балалар үй» КММ директоры мен қызметкеріне қатысты сотқа дейінгі тергеу аяқталды.

Тергеу барысында балалар үйінің әлеуметтік педагогы Мұстафина қызмет бабын пайдаланып, өзіне сеніп тапсырылған 67 миллион теңге сомасындағы ақшалай жәрдемақыны ұрлағаны дәлелденді.

«Сотталған Мұстафина балалар үйінің жетекшісінен қамқоршының мүддесін білдіруге сенімхаты бола отырып, тәрбиеленушілерге асыраушысынан айрылуы және мүгедектігі бойынша жәрдемақы ресімдеп, екінші деңгейдегі банктерде оларға карточкалық шоттар ашты. Тәрбиеленушілердің есеп айырысу шоттарына толық қолжетімділікке ие бола отырып, мобильді банкинг арқылы балалар үйінің тәрбиеленушілерінің есеп айырысу шоттарынан жеке карточкалық шотқа ақша қаражатын аударуды жүзеге асырды. Сондай-ақ тәрбиеленушілердің өздерінің банк карталарын пайдалана отырып, банкоматтардан кейбір қаражатты алып тастады», деп хабарлады ҚР ҚҚА баспасөз қызметі.

Сотталушы заңсыз іспен 2015 жылдың желтоқсанынан 2020 жылдың тамызына дейін айналысқан.

Балалар үйінің директоры Қондыбаева 2018 жылдың күзінде Мұстафинаның ұрлық фактілері туралы біліп, оны уәкілетті органдардан жасырып, тәрбиеленушілерінің шоттарына қол жеткізуін шектемеді.

Сотталушылар өз кінәсін мойындады. Қазіргі уақытта 10 миллион теңгеден астам мөлшердегі зиянның бір бөлігі балалар үйі тәрбиеленушілерінің пайдасына өтелді. Сот 52,4 миллион теңге көлеміндегі қалған соманы жәбірленушілерге қалпына келтіруді міндеттеді.

Сот үкімімен Мұстафина 7 жыл бас бостандығынан айыру және педагогикалық қызметпен айналысу құқығынан 10 жыл мерзімге айыра отырып, ҚР ҚК 189-бабы (Аса ірі мөлшерде сеніп тапсырылған бөтен мүлікті иемдену немесе ысырап ету) бойынша кінәлі деп танылды.

Қондыбаева ҚР ҚК 371-бабы (немқұрайлылық) бойынша 2,7 миллион теңге сомасына айыппұл тағайындаумен және мемлекеттік қызметте қызмет атқару құқығынан айырумен кінәлі деп танылды.

Күннің маңызды және өзекті жаңалықтарын «Егемен Қазақстан» телеграм каналынан оқыңыз