Е.Мұсабек 1946 жылы Жамбыл облысының Шоқпар станциясында дүниеге келген. 1970 жылы Абай атындағы Қазақ педагогика институтын математика мамандығы бойынша үздік бітірген. Еңбек жолын 1963 жылы Қазақ темір жолы №34 жол бөлімінде темір жол жұмысшысы болып бастаған. 25 жылдан астам уақыт Қазақ КСР Мемжоспар комитетінің Есептеу орталығында қызмет істеді. Халық шаруашылығын жетілдіруді жоспарлау жұмыстарына сіңірген қомақты үлесі үшін 1977 жылы «Халық шаруашылығын жоспарлау үздігі» деген белгісімен марапатталған.
Ерболат Нығыманұлы мемлекеттік статистика органдарында 1997 жылдан бастап жұмыс істеді. 1971 жылдан бері демографиялық зерттеулермен, әр түрлі демографиялық есептеулердің бағдарламалық жасақтамасын әзірлеумен және оны жүргізумен айналысты. Ол талай халықаралық семинарлар мен жобаларға қатысты. 20-дан астам жарияланымы бар. Келушілер әдісі бойынша «Халық көші-қоны», «Жанбасылық халық тіркелімі» кешендерін жасап, жетілдіріп, әкімшілік-аумақтық нысандар жіктеуішін құрастырып, оны ведомстволық, кейін мемлекеттік және ұлттық жіктеуіш ретінде қолданысқа енгізді.
Сонымен қатар Қазақстандағы алғашқы мульти-индикаторлық кластерлік зерттеуді (МИКЗ) басқарып, бұл зерттеудің деректер базасын құрастырды және кейінгі МИКЗ-лерді жүргізуге, қорытындыларын шығаруға белсене атсалысты. 2009 жылы Ұлттық халық санағының қорытындысын шығару кезінде аянбай еңбек етті. Сондай-ақ Е.Мұсабек елімізде екі рет жарық көрген «Қазақстанның Этнодемографиялық жылнамалығының» авторы. 2009 жылы Қырғызстандағы Халық санағының кеңесшісі қызметін атқарды. 2007-2011 жылдары Қазақстанның демографтар қауымдастығының президенті боды.
Мемлекетке сіңірген еңбегі, белсенді қоғамдық қызметі және елдің әлеуметтік-экономикалық дамуына қосқан үлесі үшін 2005 және 2016 жылы екі мәрте Қазақстан Президентінің «Құрмет» грамотасымен марапатталды.
Жоғары кәсібилігі және Қазақстанның мемлекеттік статистикасын жетілдіруге қосқан зор үлесі үшін 2005 жылы «Қазақстан статистикасының үздігі» атағы және «Денсаулық сақтау ісіне қосқан үлесі үшін» төсбелгісі берілді. 2011 жылы «Құрмет» орденімен және «Қазақстан Республикасының тәуелсіздігіне 20 жыл» мерейтойлық медалімен, 2014 жылы «Еңбек Ардагері» медалімен және «Статистика үздігі» төсбелгісімен, 2015 жылы «Қазақстан халқы Ассамблеясына 20 жыл» мерейтойлық медалімен, 2016 жылы «ЮНИСЕФ-ке 70 жыл» мерейтойлық медалімен, 2021 жылы 75 жылдық мерейтойына алғыс хаттармен марапатталған.
Ерболат Нығыманұлы Қазақстанның белгілі демографы, еңбек сіңірген қайраткері, өз ісінің шебері және талантты адам еді. Оның барлық еңбегі Қазақстанның демографиянсын дамытуға және қалыптастыруға бағытталды және оның жұмыстары ТМД елдерінде де кеңінен танымал болды.
«Ерболат Нығыманұлының демографиялық ғылым мен демографиялық талдаудың дамуына қосқан үлесі баға жетпес. Марқұмның жарқын бейнесі біздің есімізде мәңгі сақталады! Стратегиялық жоспарлау және реформалар агенттігі Ұлттық статистика бюросы марқұмның әріптестеріне, туған-туыстарына, жақындарына қайғырып көңіл айтады», деді Стратегиялық жоспарлау және реформалар агенттігі Ұлттық статистика бюросының басшысы Нұрболат Айдапкелов.
