Спикердің айтуынша, 15 тамызда қалада коронавирустық инфекцияның жергілікті 1 517 оқиғасы тіркелді, оның ішінде 1 429 жағдай симптомды және 88-і - симптомсыз. 944 адам емделіп шықты, 651 сырқат түсті. Бүгінде қолданыстағы инфекциялық төсек-орындар 63%-ды құрайды.
«АМСК және Телемедицина орталығының мобильді топтары 13 221 пациентті үйде бақылайды. Олардың жеңіл және орташа ауыр дәрежедегісі - 12 685, симптомсыз - 535 адам», деді Н. Табынбаев.
Ол сондай-ақ ағымдағы жылдың 16 тамызындағы жағдай бойынша 817 196 адам вакцинаның бірінші компонентін, ал 643 514 алматылық екінші компонентін салдырғанын айтты.
Спикер КВИ-мен ауыратын балалар саны арта түскенін айтты. Қазір 195 бала ауруханада, 2 540-ы үйінде емделіп жатыр.
«Үшінші толқын өршіп тұрған кезде Алматы ауруханаларындағы балалар саны 30-40-тан аспайтын. Штамның қазіргі түрімен балалар жиі ауыра бастады. Өткен аптада балалардың арасында жұқтыру тіпті өршіп кетті. Стационарларда 245 науқас бала болды. Өкінішке қарай, қайғылы жағдай да орын алды, 1 айлық нәресте қайтыс болды. Коронавирустың жаңа штамы өте қауіпті әрі жұқпалы, балалар оны тез жұқтырады», деді Алматы ҚДБ басшысы.
