Кездесу барысында тараптар Орал және Ертіс трансшекаралық өзендері бассейндерінің экожүйелерін сақтау және қалпына келтіру жөніндегі Қазақстан-Ресей ынтымақтастығының бағдарламаларын іске асыру барысын талқылады. Олардың ірі өзендер бассейндерінде (Орал, Ертіс және т.б.) зерттеулер жүргізу бойынша бірыңғай Жол картасында көзделген 17 іс-шараның 10-ы 2021 жылы басталды, оның 4-і жыл соңына дейін аяқталады. Қалғаны 2022 жылы басталады.
Тараптар бірыңғай Жол картасының іс-шаралар кестесін іске асыру бойынша міндеттемелерді орындау шеңберінде, сондай-ақ зерттеулердің деректерімен алмасу мақсатында ақпарат алмасуды жүргізді. Жұмыс кестесіне сәйкес бірінші жартыжылдықта гидрологиялық деректерді жинау және алмасу бойынша іс-шаралар орындалды. Тараптар осы бағыттағы жұмысты жалғастыруға келісті.
Тараптар Павлодар облысының (Былқылдақ жинақтаушы су қоймасы аймағында) және Омбы облысының (Ольховка ауылында) аумағындағы Ертіс өзенінің және жерасты суларының сапасына бірлескен мониторинг ұйымдастыруға келісті.
Сондай-ақ тараптар сарапшылардың тұрақты жұмыс кездесулерін өткізудің жоспар-кестесін бекітуге келісті. Мәселен, биылғы қыркүйек айында Жайық (Орал) трансшекаралық өзені бассейнінің экожүйесін сақтау жөніндегі Қазақстан-Ресей комиссиясының 3-ші отырысы өтеді.
Ресей тарапы Ертіс өзенінің трансшекаралық су ресурстарын бөлу туралы құжат әзірлеуді ұсынды. Қазақстандық тарап қазіргі уақытта Жоғарғы Ертіс су қоймалары каскадынан су ағызу экономиканың барлық салаларының мүдделері ескерілген «Оба және Ертіс өзендерінің су ресурстарын кешенді пайдалану және қорғау» схемаларының ережесіне сәйкес келетінін атап
өтті.
Сондай-ақ тараптар мемлекет басшыларының қатысуымен (2021 жыл, Көкшетау қаласы) өтетін «Экология және жасыл даму саласындағы ынтымақтастық» тақырыбында Ресей мен Қазақстан арасындағы XVII аймақаралық ынтымақтастық форумына дайындық мәселелерін талқылады.
«Егемен-ақпарат»
