Қазақстан кубогы жолындағы жарысты ұйымдастырушылар биылғы турнирді барынша тартысты әрі қызықты өткізу үшін алдымен Бірінші және Екінші лига командалары арасында үш кезеңнен тұратын іріктеу ойындарын өткізіп, іріктеуден іркілмей өткен ең үздік екі клубқа Премьер-лига командаларымен бірге топтық кезеңде ойнауға мүмкіндік берді. Ал бұған дейінгі ереже бойынша кубок ойындарында Бірінші лига мен Премьер-лига командалары жеребе арқылы бір-бірімен кездесіп, жеңіске жеткен команда 1/16, 1/8 сияқты келесі кезеңдерге өтетін еді.
Сөйтіп жаңа форматтағы Қазақстан кубогының бірінші және екінші кезеңіне Бірінші және Екінші лигадан барлығы 14 футбол клубы қатысты. Олардың 12-сі жеребе бойынша өзара жұп құрап, бірінші кезеңде ойнаса, қалған екі команда екінші кезеңнен бастап сынға түсті. Алғашқы екі іріктеу ойындарына «Игiлiк», «Оқжетпес», «Ақсу», «Қыран», «Оңтүстік академиясы», «Мақтаарал», «Екібастұз», «Алтай», «SD Family», «Рузаевка», «Жас Қыран», «Яссы-Түркiстан», «Жеңіс» және СДЮСШОР № 8 (Нұр-Сұлтан қ.) командалары қатысты.
Бастапқы екі кезеңнің қорытындысы бойынша, турнирдің соңғы іріктеу кезеңіне елорданың СДЮСШОР №8, Шымкенттің «Оңтүстік Академиясы», Екібастұздың «Ақсу» және Түркістан облысының «Мақтаарал» командалары өтті. Үшінші кезеңнің жеребесі бойынша топтық кезеңге шығу үшін СДЮСШОР №8 мен «Оңтүстік Академиясы» және «Мақтаарал» мен «Ақсу» командалары кездесті. Бір ойыннан тұратын бәсекеде жеңіске жеткен СДЮСШОР №8 және «Мақтаарал» клубтары Премьер-лига командаларымен ойнауға мүмкіндік алды.
Ал бір жарым айға жалғасқан топтық кезеңде Премьер-лиганың 14 және іріктеу кезеңінен өткен Бірінші және Екінші лиганың 2 командасы төрт топқа бөлініп, өзара ширек финал жолдамасын сарапқа салды. Сөйтіп өз тобынан дараланып шыққан Қарағандының «Шахтер», Петропавлдың «Қызылжар», Қостанайдың «Тобыл», Тараздың «Тараз», елорданың «Астана», Қызылорданың «Қайсар», Ақтаудың «Каспий» және Алматының «Қайрат» клубтары жарысты одан әрі жалғастыруға мүмкіндік алды.
Осыдан бірер күн бұрын 1/4 финалдың жеребесі тартылып, жартылай финалдың жолдамасын сарапқа салатын төрт жұп анықталды. Жеребе бойынша, «Тараз» – «Шахтер», «Қайрат» – «Қайсар», «Астана» – «Каспий», «Қызылжар» – «Тобыл» клубтары өзара сынға түседі. Ширек финалдың бірінші ойындары 21 және 22 тамыз күндеріне белгіленсе, қарымта кездесулер 22 қыркүйекке жоспарланған. Жарыстың 1/4 және 1/2 финалдық сатыларында командалар екі ойыннан өткізеді. Финал 28 қарашаға белгіленген.
Қазақстан футбол федерациясының хабарлауынша, ширек финалдың бірінші ойыны жуырда ғана өмірден озған танымал спорт журналисі Амангелді Сейітхановты еске алумен басталады. «Қазақстан кәсіпқой футбол лигасы осындай шешімге келді. Ширек финалдың 4 ойыны да бір минуттық үнсіздіктен басталады», делінген федерацияның хабарламасында.
Сонымен қатар Қазақстан кәсіпқой футбол лигасы (ҚКФЛ) Кубок ойындарының алдында шілде айындағы OLIMPBET-Қазақстан чемпионаты мен OLIMPBET-Қазақстан кубогының үздік ойыншысын анықтады. Үздіктерді анықтау барысында сауалдамаға қатысушы бапкерлер мен команда капитандары үш ойыншыдан тұратын тізімін атады. Алған орынға байланысты ойыншыларға ұпай берілді: 1-орын үшін – 3 ұпай, 2-орын үшін – 2 ұпай, 3-үшінші орын үшін – 1 ұпай. Барлық ұпайларды қосу арқылы қорытынды шығарылды.
Сауалдама нәтижесінде өткен айдың үздік ойыншысы деп «Шахтер» клубының тәжірибелі шабуылшысы Айдос Тәттібаев танылды. Ол 21 ұпайға ие болды. Аталған тізімде екінші орынға елордалық «Астана» клубының көшбасшысы Марин Томасов орналасты. Ол Тәттібаевтан бір ұпай кем жинады. Үшінші орын «Қайрат» командасының шабуылшысы Артур Шушеначевке бұйырды. Ол 12 ұпайға қол жеткізді.
Жүлдені жеңімпазға OLIMPBET-футболдан Қазақстан кубогының 5-турындағы «Шахтер» – «Ордабасы» ойынының алдында ҚКФЛ атқарушы директоры Қуаныш Бақытбеков тапсырды.
