Биылғы 17 елдің ең есепке жүйрік оқушыларының басын қосқан Халықаралық Жәутіков олимпиадасының жөні бөлек. Осымен оныншы рет өткізілген Білім және ғылым министрлігінің жобасына 56 команда, 390 дарынды бала қатысты. Қазақстан, Ресей, Украина, Белоруссия, Әзербайжан, Грузия, Армения, Қырғызстан, Тәжікстан, Түркіменстан, Болгария, Румыния, Сербия, Үндістан, Индонезия, Моңғолия балалары математика, физика және информатика пәндері бойынша білім жарыстырды.
Биылғы 17 елдің ең есепке жүйрік оқушыларының басын қосқан Халықаралық Жәутіков олимпиадасының жөні бөлек. Осымен оныншы рет өткізілген Білім және ғылым министрлігінің жобасына 56 команда, 390 дарынды бала қатысты. Қазақстан, Ресей, Украина, Белоруссия, Әзербайжан, Грузия, Армения, Қырғызстан, Тәжікстан, Түркіменстан, Болгария, Румыния, Сербия, Үндістан, Индонезия, Моңғолия балалары математика, физика және информатика пәндері бойынша білім жарыстырды.
Әл-Фараби атындағы Қазақ ұлттық университетінің Студенттер сарайында салтанатты түрде мәреге жеткен Х Халықаралық Жәутіков олимпиадасының Бас жүлдесін биыл да Мәскеу мемлекеттік университетінің мамандандырылған оқу-ғылыми орталығының (СУНЦ МГУ) оқушылары жеңіп алды. Ал бірінші орынды әдеттегідей Алматыдағы О.Жәутіков атындағы дарынды балаларға арналған республикалық мамандандырылған физика-математика орта мектеп-интернаты басқаларға бермей келеді.
Сонымен, биыл сарапқа салынған 183 медальдің 50-і Қазақстанда қалды. Ал алтын медальмен олимпиадашылардың 35-і марапатталды. Оның ішінде 13 бірдей алтынды О.Жәутіков атындағы дарынды балаларға арналған республикалық мамандандырылған физика-математика мектеп-интернатының оқушылары жеңіп алды.
Жүлделі орындардан табылған талантты оқушыларға Назарбаев Университетінің, Әл-Фараби атындағы Қазақ ұлттық университетінің, ҚБТУ, МУИТ гранттары бұйырды. Ал информатика пәні бойынша абсолюттік нәтиже көрсеткен әрі олимпиаданың ең жас қатысушысы Владислав Макеев (Мәскеу қаласының құрама командасы, Ресей) Илья Сегалович атындағы арнаулы жүлдеге ие болып, бағалы сыйлықты иемденді. Осы арада РМФМОМИ түлегі Илья Сегаловичтің Яндекстің негізін қалаған адам екенін айта кетуге болады.
Кезекті Жәутіков олимпиадасы мамандандырылған ең үздік 7 мектептің рейтингісін анықтап берді. Командалық есеп бойынша бас жүлдеге биыл да Мәскеу мемлекеттік университетінің мамандандырылған оқу-ғылыми орталығының (СУНЦ МГУ) оқушылары лайық деп танылды. Бірінші орынды РМФМОМИ жеңіп алды. Екінші орынды Минскідегі Беларусь мемлекеттік университеті лицейінің оқушылары мен Болгариядағы София математикалық мектебінің шәкірттері өзара бөлісті. Үшінші орындар Белгардтағы математика орта мектебінің (Сербия), Тбилиси қаласындағы №199 «Комарови» мектебінің (Грузия), Тараз қаласындағы қазақ-түрік лицейінің командаларына берілді.
Жүлделі орындардан көрінген командалардың әрбір мүшесі жоғары оқу орындарының гранттары мен бағалы сыйлықтарға ие болды. Сонымен қатар, 8 команда мақтау қағаздарымен атап өтілді.
Биыл оныншы рет ұйымдастырылған Жәутіков олимпиадасына «РМФМОМИ түлектер қоры», «ExxonMobilKazakhstan Inc»,«Интергаз Центральная Азия» АҚ пен «ZHERSU» инвестициялық-өндірістік корпорациясы демеушілік жасады.
Айнаш ЕСАЛИ,
«Егемен Қазақстан».
АЛМАТЫ.
––––––––––––––
Суретте: Назарбаев Университетінің болашақ студенттері – Бас жүлде иегерлері.