Оның айтуынша, мерзімді әскери қызметке шақырылғандардың қалған 13 пайызы – орыс, 2,5-і – өзбек, 1,5 пайыздан ұйғыр, поляк пен чешендерге тиесілі. Ал қалған 3 пайызын өзге этнос өкілдері құрайды. Брифингте департаменттің басшысы Сәкен Жүсіпов елімізде өткізіліп жатқан әскери жиындардың Ауғанстандағы оқиғаларға ешқандай қатысы жоқ екенін де айтып өтті.
2021 жылғы күзгі әскерге шақыру науқанын ұйымдастыру тақырыбына арналған брифингте департамент өкілдері екінші жыл пандемия жағдайында өткізіліп жатқан әскерге шақыру науқаны жайлы кеңінен мағлұмат берді. Мемлекет басшысының 2021 жылғы 5 ақпандағы Жарлығына сәйкес биыл азаматтарды күзгі мерзімді әскери қызметке шақыру іс-шаралары 1 қыркүйектен басталады. Жыл соңына дейін жалғасатын әскерге шақыру науқаны барысында Қарулы Күштерді, басқа да әскерлер мен әскери құралымдарды 18 бен 27 жас аралығындағы 17 мыңға жуық азаматпен толықтыру жоспарланып отыр. Спикерлер азаматтарды мерзімді әскери қызметке шақыру қолданыстағы заңнамаға сәйкес жүргізілетінін, бұл іс-шараларды негізінен жергілікті атқарушы органдар ұйымдастыратынын мәлімдеді. Ал мерзімді әскери қызметтің әскери қызметшілерін запасқа шығару олар әскерге шақырылған күннен бастап 12 ай өткеннен кейін жоспарлы түрде жүзеге асырылады. Жалпы, ел Президентінің тапсырмасына сәйкес, Қорғаныс министрлігінде өткен жылдармен салыстырғанда Қарулы Күштерге әскерге шақырылушылардың санын кезең-кезеңімен көбейту жоспарланған.
Әскерге шақыру және жиын пункттерінде коронавирус инфекциясының алдын алуға, індеттің таралуына жол бермеуге ерекше мән беріліп отырғанын айтқан департамент басшысы әскерге шақырылушыларға ПТР зерттеуі екі рет жүргізілетінін де хабарлады. «Белгіленген санитарлық-эпидемиялық шектеулерді сақтау, медициналық маскалармен, дезинфекциялау құралдарымен қамтамасыз ету – Қорғаныс министрінің ұдайы бақылауында. Әскерге шақырылушылар мен олардың ата-аналары карантиндік шектеулерді сақтау қажеттігін жете түсінгендері жөн. Себебі бұл әскери ортада індеттің жаппай таралуына жол бермеуге ықпал етеді», деді спикер.
Сонымен қатар алдағы әскерге шақыру барысында Цифрлық даму және аэроғарыш өнеркәсібі министрлігінің 1414 қызметінің сервисі арқылы әскерге шақырылушыларға SMS хабарламалар таратуды жалғастыру жоспарланған. «Хабардар ету процесінен жеке қарым-қатынас жасауды алып тастау инфекция жұқтыру қаупін азайтады», дейді департамент өкілдері.
Биылғы көктемгі әскерге шақыру кезінде мерзімді әскери қызметке әскерге шақыруды кейінге қалдыру және одан босату «Электронды үкімет» порталының «Е-лицензиялау» мемлекеттік деректер базасының ақпараттық жүйесі арқылы мемлекеттік қызмет көрсету шеңберінде жүзеге асырылған болатын. Мұндағы басты мақсат – осы бағыттағы сыбайлас жемқорлық тәуекелдерін азайту еді. Осы жүйе жөнінде толықтырып өткен спикер: «Көрсетілген мемлекеттік қызметтер көрсету тәртібі туралы нақты ақпаратты еgov.kz сайтынан алуға болады немесе ол туралы арнайы әзірленген жадынаманы жақын жерде орналасқан кез келген жергілікті әскери басқару органдарынан ала аласыздар. Біз жұмысты бұрынғыдай кері байланысты көздейтін барынша ашық форматта жалғастырамыз. Әскерге шақырылушылар және олардың ата-аналары, журналистер мен қоғам өкілдері өздеріне қажетті ақпарат алу үшін кез келген уақытта хабарласа алады. Ол үшін әрбір Қорғаныс істері жөніндегі департаментте электронды пошта жәшіктері және әлеуметтік желілерде ресми аккаунттар ашылды», деді ол. Сондай-ақ барлық ақша талап ету және басқа да сыбайлас жемқорлық көріністері бойынша кеңес алу үшін Қорғаныс істері жөніндегі департаменттердің «Қарулы Күштер – Адалдық Алаңы» жобалық кеңсесіне жүгіну керектігін, болмаса сенім телефондарына хабарласу қажет екенін айтты.
