Кеңес заманында Маңғыстау ауданындағы кеңшарларда аға есепші, бас экономист, Маңғыстау облыстық партия комитетінде нұсқаушы, бірінші хатшының көмекшісі, ауылшаруашылық бөлімінің меңгерушісі, Маңғыстау аудандық партия комитетінің бірінші хатшысы және аудандық кеңес төрағасы, облыстық халықтық бақылау комитетінің төрағасы, «Маңғыстау» агрокомбинатының бас директоры, облыстық ауылшаруашылық басқармасының бастығы, облыс әкімінің бірінші орынбасары, «Аджип» ККО директорының кеңесшісі, «ОКК» ЖШС директорының кеңесшісі қызметтерін атқарған. «Құрмет» ордені мен 7 медальдің иегері. Қазақ КСР Жоғарғы Кеңесінің және Маңғыстау облысының «Құрмет грамоталарымен» марапатталған. Маңғыстау ауданының құрметті азаматы, запастағы полковник. ҚКП XV, XVI, XVII съездерінің делегаты, Гурьев және Маңғыстау облыстық кеңестерінің депутаты болып сайланған.
Қызмет сатысы осылай өрілген Сақып Бүркітбайұлы қарымды қаламгер де еді. Ол «Бекет Ата асы шежіресі», «Маңғыстау», «Сұрасаң руымды – Дәулеталы», «Мың бояулы Маңғыстау» кітаптары авторларының бірі, «Түбектің танымал тұлғалары» атты кітабы жарық көрген. С.Керелбаев туралы өңір энциклопедиясында, өзге де кітаптарда кеңінен жазылған.
Маңғыстауда өмірден өткеніне оншақты күн болған С.Керелбаевты еске алу іс-шарасы өтті. Оған Керелбаевтар әулеті мен марқұмның отбасы қатысты.
Салтанатты іс-шараны ашып берген облыс басшысы С.Трұмов өмірі өнегелі іске, сөзі ғибратқа толы тұлға туралы тың естеліктер айтып, абзал ағаның есімі ешқашан ұмытылмайтынын жеткізді.
– Сақып Бүркітбайұлы Маңғыстау топырағында дүниеге келіп, өмірінің соңына дейін кіндік қаны тамған жерінің дамуына қомақты үлес қосқан арда азамат еді. Тәуелсіз Қазақстанның қалыптасуы мен дамуы жолында аянбай тер төкті. Елдің тізгінін ұстап, қоғамға абыройлы қызмет қылды. Өзінің 45 жыл қызметбаянында игі істерге мұрындық болды. Ол кешкен ғұмыр, ол өткен еңбек жолы – өлке тарихының жарты ғасырлық жылнамасындай. Артына өшпес із бен өлмес сөз қалдырған Сақып Бүркітбайұлының есімі ұмытылмақ емес. Оның жарқын бейнесі мәңгі жадымызда қалады, – деді ол.
Аталған шарада Сақып Бүркітбайұлының дүниеден қайтуына байланысты Қазақстан Республикасының Мемлекеттік хатшы Қырымбек Көшербаевтан келіп түскен көңіл айту хаты оқылды. Сондай-ақ мемлекет және қоғам қайраткері Ләззат Қиыновтың, Қазақстанның еңбек сіңірген қайраткері Ғани Кариннің, ғалым, мемлекет және қоғам қайраткері Өмірзақ Озғанбаевтың, Парламент Мәжілісінің бұрынғы депутаты Гүлнәр Сейтмағанбетованың арнайы жолдаған көңіл айту бейнежазбалары көрсетілді.
Ер есімі ел есінде мәңгі сақталатыны анық.
Маңғыстау облысы
