Іс-шараға жиналғандар өңірдің тәуелсіздік жылдары жеткен жетістіктері жайында пікір алмасты.
Еліміз тәуелсіздік алғалы Маңғыстау облысы халқының саны екі есе өскен. Бүгінде қазыналы түбекте 720 мыңнан астам адам тұрады.
Маңғыстау облысының әкімі С.Трұмовтың айтуынша, халық санының көбеюіне байланысты қалалар аумағы кеңейіп, жаңа ауылдар мен тұтас бір аудан пайда болды. Мұнайлы – еліміз тәуелсіздік алғаннан кейін Елбасы Н.Назарбаевтың тікелей шешімімен Қазақстанда құрылған алғашқы аудан. Ол кезде аудан халқының саны 53 мың болса, осы күні Мұнайлы ауданының 174 мың тұрғыны бар.
Тәуелсіздік алған отыз жыл ішінде өңірдің әлеуметтік саласында да оң өзгерістер орын алды. Мәселен, 1991 жылы өңірде 151 балабақша жұмыс істесе, 2020 жылға қарай олардың саны 311-ге жеткен. Сонымен қатар орта білім беретін мектептер саны 1,5 есе өскен. Қазір аймақта 140-тан астам мектепте оқушыларға білім мен тәрбие беріліп жатыр.
Өңір басшысы С.Трұмов 30 жылда денсаулық сақтау саласы да елеулі өзгерістерге ұшырап, жоғары медициналық технологиялармен жабдықталған, тәлімі зор, тәжірибесі мол мамандары бар емханалар, ауруханалар ашылғанын айтты.
– Егемендік алғаннан бері облысымызда 150-ден астам денсаулық сақтау нысаны іске қосылған. Озық үлгідегі Ана мен бала үйі, Қан орталығы, Кардиохирургия орталығы мен Онкологиялық диспансер ашылып, ем алу үшін алысқа сабылатын тұрғындарға облыс аумағында емделіп, күрделі оталарды жасауға мүмкіндік туды. Былтыр жедел жәрдем автопаркі 100%-ға жаңарып, талапқа сай, қажетті медициналық құралдармен толық жабдықталған жаңа көліктер сатып алынды, – деді ол.
Маңғыстаудың шекаралық облыс ретінде транзиттік, көліктік-логистикалық және инфрақұрылымдық әлеуетінің артуы да тәуелсіздік алған соң кең көлемде жүзеге асырыла бастаған жұмыс. Ел астанасынан шалғайда, түбекте жатқан Маңғыстауда темір жолы, теңіз және авто жолдар қатар дамып, бүгінде тоғыз жолдың торабына айналды.
Тәуелсіздік тарихында тұңғыш рет Кавказ, Түркия арқылы Еуропа елдеріне жаңа бағыт ашылды. Үш мемлекетті жалғайтын «Өзен – Берекет – Горган» халықаралық темір жол дәлізі ашылды.
Маңғыстау облысы тұрғын үй құрылысы бойынша жақсы жетістіктерге қол жеткізді. Тәуелсіздік алғалы бері Маңғыстауда 11 млн 333 мыңнан астам шаршы метр тұрғын үй пайдалануға берілген. Облыс әкімі баспасөз қызметінің хабарлауынша, отыз жыл ішінде облыстың жалпы өңірлік өнімі 48 есе өсті. Ал жан басына шаққандағы көрсеткіш 23 есеге артқан. Жалпы, 2005 жылдан бастап Маңғыстау облысында шағын және орта бизнесті дамытудың оң динамикасы байқалып, соңғы 15 жылда шағын кәсіпкерлік субъектілерінің саны 3 есе ұлғайған.
Президент Қасым-Жомарт Тоқаевтың қолдауымен өңірдегі инфрақұрылым жаңарып, жаңа жолдар салынды. Бүгінде мұнайлы өлке туризм орталығына айналып келеді.
Жиын барысында сөз алған облыстық қоғамдық кеңестің мүшесі Жәнібек Қожық тәуелсіздік алғаннан кейін елімізде Ата Заңымыз қабылданып, шекарамыз белгіленгенмен қатар тәуелсіз сана қалыптаса бастағанын айтады. Ол жасампаздық жолында Маңғыстаудың да жеткен жетістіктері аз еместігін тілге тиек етті. «Тәуелсіздік алғанға дейін Маңғыстаудың бір де бір ауылында газ болған жоқ. Соңғы 20 жылда Маңғыстау 100 пайыз қамтылды. Бұл республика бойынша бірінші көрсеткіш», деді Ж.Қожық.
Биылғы мерейлі жыл аясында облыста «Ел игілігі үшін!» жобасы басталды. Жоба өңір тұрғындары үшін аса қажетті әлеуметтік маңызы бар нысандар мен шараларды жүйелі іске асыру үшін жасақталған. Жыл басынан бері облыс тұрғындарына әртүрлі тартулар жасалып жатыр. Ауылдарда спорт кешендері, жаңа саябақтар ашылып, субұрқақтар іске қосылды. Ақтауда Тұңғыш Президент саябағының құрылысы басталды.
Жыл соңына дейін тағы бірқатар өндірістік және әлеуметтік-мәдени нысандарды халық игілігіне тапсыру көзделуде. «Ауыл – Ел бесігі» жобасы аясында жалпы 3 млрд теңгеге 102 шақырым жол салынып, орташа жөндеу жұмыстары жүргізіледі. Жаңа оқу жылында еңселі мектептер мен балабақшалар пайдалануға беріледі деп күтілуде.