Ақтау қаласында жуырда қос мерекеге – ел Тәуелсіздігінің 30 жылдығы аясында және Конституция күніне орай 18-шағын ауданда орналасқан 4 тұрғын үй пайдалануға берілді. 180 пәтерден тұратын үй «Нұрлы жер» мемлекеттік бағдарламасы аясында бой көтерген. Кілт тапсыру рәсіміне Ақтау қаласының әкімі Н.Қилыбай қатысып, баспаналы болған азаматтарды қоныс тоймен құттықтады.
– Қаламызда мемлекет қолдауы арқылы баспаналы болып, қоныс тойын тойлайтындар саны артып келеді. Осы жазда «Аққу-3» тұрғын үй кешенінен 443 пәтер беріліп, қуанышқа куә болдық. Бүгін міне, жалпы ауданы 10 150 шаршы метр болатын жаңа тұрғын үйді пайдалануға берудеміз. Мерекемен тұспа-тұс келген қоныс тойларыңыз құтты болсын! Шаңырақтарыңыз шаттыққа толы болып, береке-бірлігіміз арта берсін, деді қала басшысы.
Іс-шараға жиналғандар толық емес отбасы Медина Алагөзованың жаңа шаңырағында болып, дәм татты. Жаңа қоныстың алғашқы қонағы болған ауыл ақсақалдары бата берді. Келер жылы 19А және 18-шағын аудандарында көппәтерлі 9 тұрғын үйді пайдалануға беру жоспарлануда.
Осылайша өңірде қоныс тойын тойлаушылар саны артпақ.