Бокс • 01 Қыркүйек, 2021

Азияда алдарына жан салмады

80 рет көрсетілді

Біріккен Араб Әмірліктерінің Дубай қаласында бокстан жастар және жасөспірімдер арасындағы Азия біріншілігі өз мәресіне жетті. Айтулы жарыста Қазақстанның ұлдар және қыздар құрамасы барлық салмақ дәрежелері бойынша бақ сынады. Нәтижесінде, 51 салмақ бо­йынша жұдырықтасқан бокс­шыларымыз жалпы саны 47 медаль жеңіп алды (19 алтын, 15 күміс және 13 қола). Оның ішіндегі 11 алтын, 6 күміс пен 5 қола жас­тар, қалғаны жасөспірімдер құрамасына тиесілі.

Жасөспірімдердің аяқ алысы жаман емес

Биылғы жастар мен жас­өс­пірімдер арасындағы бокстан Азия чемпионатында (ASBC) құрлық біріншілігінде 51 жаңа жеңімпаздың есімі анықталды (25 қыз бен 26 ұл). Бұл – салмақ дәрежелерінің саны бойынша рекордтық көрсеткіш. Сары құрлық біріншілігіне ең көп боксшы Қазақстан, Өзбекстан және Үндістан құрамаларынан қатысты.

Биылғы біріншіліктің тағы бір ерекшелігі, тарихта бірінші рет бір чемпионатта екі буынның (жас ерекшелігіне қарай) өкілдері шаршы алаңға шықты. Атап айтқанда, 2003 пен 2004 жылы туғандар жастар арасында бақ сынаса, 2005-2006 жылы туған боксшылар жасөспірімдер арасында кім мықтыны анықтады.

Финалдық жекпе-жектерді алдымен Аркадий Топаев баптайтын жасөспірімдер құрамасы бас­тап берді. Бұл сында Қазақстан құрамасының жеті өкілі финалға шығып, оның төртеуі Азия чемпио­натында атой салды. Атап айтар болсақ, барлық қарсыласынан басым түскен Дамир Байпақов (46 кг), Төрехан Сабырхан (52 кг), Адайбек Ниязбаев (54 кг) және Бақтияр Анарбаев (57 кг) тұғырдың ең биік сатысынан көрінді. Ал финалда қарсыластарына есе жіберген Ислам Советов (66 кг), Мохаммед Аттия-Хамед (81 кг), Ердос Шәріпбек (+ 81 кг) күміс жүлдені мойындарына тақты. Азия біріншілігінің жартылай финалында жеңілген Айдар Қадірхан (48 кг), Илья Калинин (50 кг), Мадияр Тайпақов (60 кг), Виктор Литвинов (70 кг) пен Дәулет Төлемісов (75 кг) чемпионатты қола жүлдемен қорытындылады.

Осылайша, Қазақстанның жас­өспірімдер құрамасы Біріккен Араб Әмірліктерінде 4 алтын, 3 күміс және 5 қола медаль жеңіп алды. Осы нәтижемен олар жалпыкомандалық есепте екінші орынды иеленді. Ал­дымызда – Өзбекстан боксшылары. Олар 6 алтын медаль олжалады.

Сонымен қатар Елдос Сайдалин жетекшілік ететін қыздар арасындағы жасөспірім боксшылар да жалпы есепте екінші орынға қол жеткізді. Жерлестеріміз ел қор­жынына 4 алтын, 6 күміс және 3 қола жүлде салды. 6 алтын, 4 күміс медаль жеңіп алған үндістандық қыздар Азия біріншілігін бірінші орынмен аяқтады. Ал Өзбекстан құрамасының боксшылары 3 алтын және 3 күміс жүлдеге қол жеткізді.

Қазақстан құрамасы сапынан Виктория Байдукова (54 кг), Ұлжан Сәрсенбек (57 кг), Аружан Жаңабаева (66 кг) және Үміт Әбілқайыр (81 кг) Көк туымызды көкте желбіретсе, Еңлік Бостыбаева (50 кг), Томирис Мырзақұл (52 кг), Әсем Таңатар (60 кг), Әйгерім Қаб­долда (63 кг), Ажар Түркістанова (75 кг), Шұғыла Рысбек (+ 81 кг) – күміс, Элянұр Тұрғанова (46 кг), Анита Адишева (48 кг) және Бақыт Сейдиш (70 кг) қола медаль иеленді.

 Жастарымыз – Азияда алдыңғы қатарда

Сәуір айында Польшаның Кель­це қаласында өткен бокстан жастар ара­сындағы әлем біріншілігінде 2 алтын, 2 күміс және 1 қола медаль­мен жалпыкомандалық есепте екінші орынға табан тіреген Қазақстанның жастар құрамасы Азия чемпионатында да өздерінің мықтылығын дәлелдеді.

Аса жеңіл салмақта Кельцеде әлем чемпионы атанған Санжар Тәш­кен­бай Дубайда да жеңіс тұғырының ең биік сатысынан көрінді. Финалда үндістандық Вишванат Суришті 5:0 есебімен жеңіп, Азия чемпионы атанды. Түркістан облысының тумасы осылайша бір жыл ішінде әлем біріншілігінде де, Азия чемпионатында да топ жарды. Ал әлем біріншілігінде күміс жүлде ен­шілеген Елнұр Сүйінбай (63,5 кг) Біріккен Араб Әмірліктерінде са­ры құрлықтың алтын медалін мой­нына тақты. Сонымен қатар Нұр­сұлтан Алтынбек (54 кг), Әбдіғәлі Әбдікерім (57 кг), Ерасыл Ермек (60 кг), Абзал Серік (67 кг), Бақберген Әлиасқаров (75 кг) және Темірлан Мұқатаев (86 кг) Азияда теңдессіз деп танылды.

Өкінішке қарай, финалдық айқаста қарсыластарына жол берген ауыр салмақтағы Мәди Әміров (92 кг) пен аса ауыр салмақтағы Да­ниял Сапарбай (+ 92 кг) күміс ме­дальды қанағат тұтты. Екі жерле­сіміз де финалда өзбекстандық қарсы­ластарынан жеңілді. М.Әміров Нус­ратбек Тохировтан басым дауыспен (2:3), Д.Сапарбай төрешілердің бір ауыз шешімімен (0:5) Жахонгир Зоки­ровтан ұтылды. Ал жартылай финалда қарсыластарына жол бер­ген Арман Алматұлы (71 кг) мен Дәурен Мамыр (82 кг) Азия бірін­шілігінің қола жүлдегері атанды.

Осылайша, Қайрат Сәтжанов жетекшілік ететін Қазақстанның жастар құрамасы Дубайдағы доданы 8 алтын, 2 күміс және 2 қола медальмен қорытындылады. Осы нәтижемен жалпыкомандалық есепте көш басына шықты. 3 алтын, 3 күміс және 1 қола медаль жеңіп алған Өзбекстан жастар құрамасы екінші орынға табан тіресе, үздік үштікті Үндістан боксшылары түйіндеді. Олар 2 алтын, 3 күміс, 4 қола медаль олжалады.

Тағы бір айта кетерлігі, Елнұр Сүйінбай жастар арасындағы Азия чемпионатының ең үздік боксшысы деген атаққа ие болды.

Елдос Сайдалин жаттықтыратын жастар арасындағы Қазақстан қыздар құрамасы да барлық салмақ дәрежесі бойынша бақ сынады. Финалдық сайыста жұдырықтасқан Милана Аюпова (63 кг), Аида Са­ры­барова (81 кг) және Диана Ма­гауяева қарсыластарынан басым түсіп алтыннан алқа тақса, финалда сүрінген Айшагүл Елеубаева (54 кг), Жұлдыз Шаяхметова (60 кг), Гау­һар Шайбекова (70 кг) мен Дана Ди­дай (75 кг) күміске қол жеткізді. Ал Гүлназ Бөрібаева (48 кг), Гүлнар Тұ­рапбай (52 кг) және Шахназ Исаева (57 кг), қола медальды қанағат тұтты.

Жалпыкомандалық есепте Өзбекстан құрамасы алдына жан салмады. Олар 5 алтынды олжалап, үздіктер қатарынан көрінді. Екінші орындағы Үндістан қоржынында 4 алтын бар. Қазақстан құрамасы үш алтынмен үшінші сатыға жайғасты.

 

СУРЕТТЕ: чемпионаттың
«Ең үздік боксшысы» атанған
Елнұр СҮЙІНБАЙ

Соңғы жаңалықтар

Доллар қымбаттады

Қаржы • Бүгін, 15:55

Киногерлер ағаш отырғызды

Қоғам • Бүгін, 09:17

Ұқсас жаңалықтар