Құжатта нақты көрсетілген 5 негізгі бастаманың ішінде біздің көңілімізден шыққаны – Президенттің мәдениет қызметкерлері, мұрағатшылар, кітапханашылар, техникалық қызметкерлер, қорықшылар, көлік жүргізушілері секілді қарапайым еңбек адамдарының жалақысын жыл сайын орта есеппен 20 пайызға өсіру туралы тапсырмасы. Мемлекет басшысы бұл бастаманың игілігін тұтастай алғанда 600 мың қазақстандық көретінін атап өтті.
Соның ішінде білім саласындағы мәдени, медициналық, техникалық қызметкерлердің, кітапханашылардың айлық жалақысын көтеруге қатысты өте қажетті, оңтайлы ұсыныстар айтылды. Біз бұл мәселені депутаттық сауал арқылы көтергенбіз. Өйткені өңірлерді аралаған кезімізде дәл осы санаттағы еңбек адамдары мардымсыз еңбекақылары жөнінде мәселе көтеріп, жағдайларын айтқан еді. Жолдауда осы қызметкерлердің жалақысы кезең-кезеңмен көтеріледі деп нақты айтылды. Бұл – өте құптарлық жайт.
Ең бастысы – білім саласы алдағы уақытта бәсекелестікке қабілеттілік тұрғысынан бір қадам алда жүруі керек екеніне ерекше мән берілді. Бұл тұрғыда цифрлы технологияларды терең дамыту қажеттігі айтылды. Бұл – бірінші мәселе.
Екінші мәселе – қазіргі таңда білім беру ұйымдарындағы орын тапшылығы 200 мыңнан жоғары. Алдағы 5 жылда бұл сан миллионға жетуі мүмкін. Осыған орай Nur Otan партиясының Жол картасында алдағы уақытта 800 мектеп салу есебінен үш ауысымды және апаттық жағдайдағы мектептер проблемасын шешу қарастырылған болатын. Енді жаңадан салынатын мектептер санын мыңға жеткізу ұйғарылып отыр. Бұл – өте дұрыс шешім екендігі сөзсіз.
Қосымша білімді дамыту да үлкен мәселе. Айталық, бала өз мектебінен басқа жерге бармай, жолға уақытын кетірмей, білім алып отырған ошағында өзіне қажетті дағдыларын, ғылымға, шығармашылыққа жол ашар қасиеттерін дамытатын болса, осының өзі тәрбие саласындағы көптеген мәселелерді шешуге негіз болар еді. Сондықтан да өз басым мың мектеп салу бастамасын қуана қабылдадым.
Жұлдыз СҮЛЕЙМЕНОВА,
Мәжіліс депутаты
