1938 жылдың 27 желтоқсаны күні КСРО Жоғарғы Кеңесі төралқасының шешіміне сәйкес Кеңестер Одағында Социалистік Еңбек Ері атағы бекітілген. Дәл осы кезеңнен тоқсаныншы жылдарға дейінгі елу жылдан астам уақыт аралығында Кеңестер Одағындағы бұл жоғары мемлекеттік марапатпен небәрі 1650 қазақстандық марапатталған. Оны Қазақстаннан ең соңғы алған адам – қазақтың бұлбұл әншісі – Бибігүл Төлегенова. Иә, жоғарыдағы деректер Социалистік Еңбек Ері атағы кез келгеннің қанжығасында кететін, кез келген адам оп-оңай қалпақпен соғып ала қоятын атақ емес екенін көрсетеді.
1938 жылдың 27 желтоқсаны күні КСРО Жоғарғы Кеңесі төралқасының шешіміне сәйкес Кеңестер Одағында Социалистік Еңбек Ері атағы бекітілген. Дәл осы кезеңнен тоқсаныншы жылдарға дейінгі елу жылдан астам уақыт аралығында Кеңестер Одағындағы бұл жоғары мемлекеттік марапатпен небәрі 1650 қазақстандық марапатталған. Оны Қазақстаннан ең соңғы алған адам – қазақтың бұлбұл әншісі – Бибігүл Төлегенова. Иә, жоғарыдағы деректер Социалистік Еңбек Ері атағы кез келгеннің қанжығасында кететін, кез келген адам оп-оңай қалпақпен соғып ала қоятын атақ емес екенін көрсетеді.
Осындай бірегей атақ иесі Орал облысында отыз жылдан астам уақыт бойы Орал, Чапаев және Фурманов (Жалпақтал) аудандық партия комитеттерінің бірінші хатшысы қызметін атқара жүріп, Ақжайық өңірінде аты аңызға айналып кеткен азамат басшы – Кенжебек Меңдәлиев.
Өткен аптада Қазталов ауданына қарасты Жалпақтал өңірінде Социалистік Еңбек Ері Кенжебек Меңдәлиевтің туғанына 100 жыл толуына орай оған ескерткіш мүсін салтанатты жағдайда ашылды. Кенжебек ағамыздың тау қозғалса қозғалмайтын нар тұлғасы, қайталанбас азаматтық және басшылық бітім-болмысы жөнінде кезінде қазақтың дауылпаз ақыны Тайыр Жароков та шексіз ризашылық сезіммен қалам тербеген екен. Ал, Жалпақтал өңірінің тұрғындары ол кісінің адамдарға өте жақын болғанын, олардың мұң-мұқтаждарын бөлісуге әзір тұрғанын әлі күнге дейін сүйсіне айтудан танар емес.
Дінмұхамед Қонаевтың да өзінің «Өтті дәурен осындай» атты кітабында Кенжебек Меңдәлиевтің есімін республикадағы ең озық он жеті аупарткомның бірінші хатшылары арасында ілтипатпен атауы тектен-тек болмаса керек. Кеңестік кезеңде белгілі бір өңірде партия басшылығында болғандар қызметінен кеткеннен кейін көп жағдайларда өзі басшылық жасаған өңірден өзге жаққа, облыс, республика орталықтарына қоныс аударып отырған. Ал К.Меңдәлиев зейнетке шыққаннан кейін де ел-жұрттың ортасында, өзі басқарған Фурманов ауданының орталығында тұрақтап тұрып қала берген. Бір атап өтерлігі – ол барлық құрметті ел-жұрттан зейнет демалысына шыққаннан кейін көбірек көрген.
Темір ҚҰСАЙЫН,
«Егемен Қазақстан».
Батыс Қазақстан облысы,
Қазталов ауданы,
Жалпақтал кенті.
–––––––––––
Суретте: Жалпақтал кентінде Социалистік Еңбек Ері Кенжебек Меңдәлиевке орнатылған ескерткіш мүсін.
