Теміржолшылар мекеніндегі проблеманы көтерген «Темір жолды жағалап топ бала жүр» атты сол мақаладан кейін Мемлекет басшысы Қасым-Жомарт Тоқаев Twitter-дегі парақшасында өзекті мәселені шешу үшін Үкімет нақты шаралар қабылдауы қажеттігін жазған болатын. Осыдан кейін көп ұзамай құрылысы басталған мектеп биылғы Білім күнінде пайдалануға берілді.
Екі қабаттан тұратын білім ошағының бірінші сыныбына 40 бала қабылданып отыр. Екі ауысымда 442 бала білім алатын мектепте 20 сынып кешені, спорт, мәжіліс залдары, кітапхана, асхана бар.
Жаңа нысанның ашылуында облыс әкімінің орынбасары Балжан Шәменова балаларды Білім күнімен құттықтап, жыл сайын тұрғындар қатары көбейіп келе жатқан аумақтағы типтік мектеп мемлекеттің салаға деген ерекше қолдауының көрінісі екенін атап өтті.
Темір жол саласының ардагері Бөлекбай Бектұрғановтың айтуынша, жұрт көптеп қоныс тебе бастаған ауданнан мектеп салу мәселесі соңғы 20 жыл бедерінде дүркін-дүркін көтеріліп келген екен.
«Пойыздар жүйткіп жатқан жолды кесіп өтудің қаупін айтып жату артық шығар. Сол жолмен мектепке кеткен баласы қайтып келгенше үлкендер жандарын шүберекке түйіп отыратын еді. Бас газетте көтерілген мәселені назарға алып, тиісті орындарға тапсырма берген Мемлекет басшысына, жақсы істің басында жүрген азаматтарға айтар алғысымыз шексіз», дейді ардагер.
Кент тұрғыны Гүлнәз Әбділдаева кішкентайын бірінші сыныпқа алып келіпті. Бұрын шойын жолдың арғы бетіне қатынап оқып келген екі қызы да енді жаңа мектепте оқиды.
«Балаларымыз он бес рельстен өтіп келгенше алаңдап, алдынан шығып күтіп алатынбыз. Әсіресе ерте қас қараятын қыстың күні қиын еді. Шүкір, ол күндер де артта қалды» дейді ол.
– Он бес мыңға жуық тұрғыны бар кенттегі үлкен мәселе – бар мектептің темір жолдың бір жақ бетінде орналасқандығы еді. Енді ол толығымен шешілді. Шойын жолдың осы бетіндегі баланың бәрі жаңа мектепте білім алады. Жалпы, жыл сайын облыста білім ошағының табалдырығын тұңғыш аттайтын балалардың қатары көбейіп келе жатқаны байқалады. Биыл өңірде 7 004 түлек мектеп бітірсе, бірінші сыныпқа 18 279 бала қабылданып отыр. Осыған байланысты мемлекет-жекеменшік әріптестігі аясында салынатын білім ошақтарының қатарын көбейтуді қолға алдық. Биыл 6 мектеп пайдалануға берілсе, алдағы 5 жылда 28 білім ошағы бой көтереді, – дейді облыстық білім басқармасының басшысы Ақзира Қасымова.
Салтанатты шарадан кейін санитарлық талапты сақтай отырып жаңа мектептегі алғашқы сабақ басталды.
Қызылорда облысы
