Аймақтар • 03 Қыркүйек, 2021

Жолдау міндеттерін орындаудың жүйелі тәртібі айтылды

Шымкент қаласының әкімі Мұрат Әйтенов Мемлекет басшысының «Халық бірлігі және жүйелі реформалар - ел өркендеуінің берік негізі» Қазақстан халқына арнаған Жолдауында айқындалған міндеттерді қала аумағында іске асырудың жүйелі тәртібін жария етті, деп хабарлайды Egemen.kz.

Ботакөз БАҚБЕРГЕН

Қала әкімі бұл саяси құжатта мемлекет дамуының стратегиялық басымдықтары айқындалып, экономикалық даму, денсаулық сақтау, білім беру, өңірлік даму сияқты маңызды 7 бағыт бойынша іске асуы тиіс міндеттер белгіленгенін атап өтті.

Қаланың әлеуметтік-экономикалық дамуы Президенттік Жолдау аясында қабылданатын Жалпыұлттық жоспар бойынша жүзеге асырылады.

«Экономикалық өсімге қол жеткізуде кәсіпкерлікті қолдауға 7 миллиард теңге бағытталып, 2250 бизнес өкілдеріне қолдау көрсетілетін болады. «Бизнестің жол картасы» бойынша 1 мың жоба қамтылады. «Бизнестің жол картасы» және «Қарапайым заттар экономикасы» бағдарламалары аясында бүгінге дейін 57,4 миллиард теңгеге 1 788 жоба қаржыландырылып, 7,2 мың жұмыс орны ашылды. «Қарапайым заттар экономикасы бойынша биылға жоспарланған 80 жобаның 61-і қаржыландырылды. Қаланың экспорттық әлеуетін арттыруда «Жұлдыз» индустриалды аймағында 200 миллиард теңгеге 60 ірі жобаны, «Стандарт» жеке индустриалды аймақта 180 миллиард теңгеге 30 жобаны іске асыру мүмкіндігіміз бар. Халықты азық-түлік өнімімен толық қамтамасыз ету бағытында 2 агроиндустриалды аймақтың құрылысы басталды. Ауылшаруашылық өнімдерін терең өңдеуде «Бозарық» тамақ өнеркәсібі индустриалды аймағы құрылып, құны 23 миллард теңгені құрайтын 21 жоба іске асады», деді қала әкімі.

Қалада азық-түлік тауарларының бағасын тұрақтандыру, агроөнеркәсіпті дамыту шеңберінде 136 гектарға заманауи өнеркәсіптік жылыжай кешендері салынады. Мұнда 30 миллиард теңгеге 20 жоба жүзеге аспақ.

Бүгінде қалада 3 әлеуметтік дүкен жұмыс істейді. Жыл соңына дейін қосымша 7 әлеуметтік дүкен ашу жоспарлануда. Оған қоса, 2025 жылға дейін 1 мың төсек орындық аурухана, 10 медициналық мекеме, 12 дәрігерлік амбулатория іске қосылмақ.

Тікелей эфирді қорытындылай келе, Мұрат Дүйсенбекұлы Мемлекет басшысының Жолдауы мемлекеттік тұрғыдағы межелерді белгілейтінін атап өтіп, ел тұрмысын түзеуге, азаматтардың өмір сапасын арттыруға қызмет ететінін жеткізді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз