Жазғы лагерьдің ашылуына Мәжіліс депутаты, Ұлттық еріктілер желісінің төрағасы Вера Ким, АҚДМ Азаматтық қоғам істері комитетінің төрағасы Мадияр Қожахмет, «Рухани жаңғыру» қазақстандық қоғамдық даму институтының басқарма төрағасы Асылбек Есенбаев қатысты. Өз сөзінде А.Есенбаев Мемлекет басшысы Қасым-Жомарт Тоқаевтың бастамасы бойынша Қазақстанда 2020 жыл Волонтер жылы деп жарияланғанын атап өтті. «Президент волонтерлікті тек ұлттық деңгейде ғана емес, әрбір қала мен ауылда дамыту қажеттігін бірнеше рет айтты. Бұл мемлекеттің волонтерлік институтын жүйелі, жаңа деңгейге шығаруға мүдделі екенін білдіреді. Ол үшін бізде үлкен әлеует бар», деді ол. ҚҚДИ басқарма төрағасы өткен жылғы пандемия ел үшін қиын сынақ болғанын айта келіп, түрлі әлеуметтік зерттеулер мен бағалаулар бойынша сол бір күрделі кезеңде қазақстандықтардың 45%-ға жуығы волонтер атануға дайын болғанын жеткізді.
АҚДМ Азаматтық қоғам істері комитетімен бірлесіп іске асырылатын Birgemiz: áreket ýaqyty жобасы аясында табысты өңірлік волонтерлік жобалардың жинағы әзірленуде. «Рухани жаңғыру» ҚҚДИ Ұлттық волонтерлік желінің көмегімен www.qazvolunteer.kz.бірыңғай онлайн-платформасында «Жыл волонтері» халықаралық сыйлығын өткізетін болады.
