Жолдаудағы ауыл шаруашылығының ұлттық экономиканың негізгі қозғаушы күшіне айналатыны туралы қағида ауыл шаруашылығы мамандарының ғана емес, ел жағдайын ойлайтын бүкіл қауымның ойын толқытып, тереңде жатқан арманы мен үмітін, сыры мен шынын шайқады. «Ауыл шаруашылығы жерлерін толық экономикалық айналымға түсіру мүмкіндігі» туралы сөз – шындықтың жүзіне тура қарап айтылған, ауыл еңбеккерлерінің жарқын болашаққа деген үміті мен талпынысын күшейтетін тұрлаулы тұжырым.
Жолдаудағы әлеуметтік маңызы зор, өмірлік мәні үлкен ойлардың тұтасқан бір желісі қолжетімді әрі сапалы білім туралы. «Біздің білім беру жүйеміздің қолжетімді әрі инклюзивті болуы» жайындағы қағида – Президент Жолдауындағы әрбір отбасының, үлкеннің де, кішінің де көкейін тескен өзекті мәселе. Бұл мәселенің шешіліп, іс жүзіне асуына қабілеті мен біліктілігі бар әрбір маман өз тарапынан лайықты үлесін қосуы абзал.
Мемлекет басшысының Жолдауында әлеуметтік маңызы жоғары, әрбір ата-ананың, әрбір қоғам мүшесінің көңілінде тұнып тұрған іргелі ойлармен сабақтас өмірлік мәні терең ірі міндеттер тиянақталған, жалпыхалықтық, ұлттық, мемлекеттік маңызы зор қағидалар жүйесі негізделген. Оларды нақты іс-қимыл арқылы жүзеге асыру мемлекеттік атқару институттарынан үлкен жауапкершілікті, кәсіби біліктілік пен іскерлікті талап етеді. Білім, ғылым саласындағы оқу орындары мен зерттеу институттары Президент Жолдауынан туындайтын міндеттерін талдап, талқылап, оны жүзеге асыру мақсатында белсенді ізденіс жұмыстарын бастап кетті.
Жанғара ДӘДЕБАЕВ,
Әл-Фараби атындағы Қазақ ұлттық университеті жанындағы Абай ғылыми-зерттеу институтының директоры, филология ғылымдарының докторы, профессор
