Жеңімпаз атанған Косолаповтар отбасын кеншілер әулеті деп құрметпен айтуға болады. Егер санамалап берсе, әулеттің жер астындағы еңбек өтілі 370 жылға жуық уақытты құрайды. Ал қазіргі таңда Косолаповтар отбасының 12 мүшесі «АрселорМиттал Теміртау» АҚ-ның Көмір департаментіне қарасты кәсіпорындарда абыроймен еңбек етіп жүр.
– Бізді кеншілер әулетінің өкілдері ретінде кәсіпорын басшылығы ұсынды. Біз төртінші буындағы кеншілерміз. Біздің жалпы жұмыс өтіліміз 365 жылдан асады. Қазіргі уақытта Шахтинск қаласының көмір өнеркәсібі кәсіпорындарында біздің отбасымыздың 10 мүшесі еңбек етеді. Біреуі зейнеткерлікке шықса, енді біреуі оның ісін одан әрі жалғастырып әкетеді. Байқау жеңімпазы атану үлкен мәртебе, өте қуаныштымыз, – деп ағынан жарылады Косолаповтар отбасының мүшесі Людмила.
Бұл отбасындағы отағасы мен отанасы да Ленин атындағы шахтада жұмыс істейді. Олардың шаңырақ көтергендеріне 18 жылдан асқан. Екі ұлды тәрбиелеп өсірген үлгілі ата-ана. Отағасы Валерий Косолапов 2019 жылы өткен «Жыл адамы» байқауының «Жыл шахтері» аталымы бойынша жеңімпаз болған екен.
Жалпы, аталған отбасы «Мерейлі отбасы» байқауына 2017 жылы да қатысып, бақ сынапты. Сонда олар қалалық турда жеңіске жеткен екен.
– Біздің отбасы үлкен және көп ұлттан құралған. Біз Қазақстандағы барлық мерекелерді, соның ішінде православ және мұсылман мейрамдарын да атап өтіп отырамыз. Үйде қазақша ет пісіріп, славян тағамдарын да дәмді етіп даярлаймыз. Осы дәстүр біздің ынтымағымызды берік қыла түседі. Біздің үйге қонақ жиі келеді. Ағайын-туыспен жиылып, саяхаттарға да шығып тұрамыз. Отбасымыздағы бір-бірімізге деген құрмет біздің бақытты өміріміздің кепілі, – дейді отанасы Людмила.
Енді Косолаповтар отбасы Қарағанды облысының намысын «Мерейлі отбасы» Ұлттық конкурсының республикалық кезеңінде қорғайтын болады.
«Мерейлі отбасы» байқауында конкурс ережесі бойынша төрт орын тағайындалған болатын. Жүлделі екінші орынды Шет ауданынан қатысқан Ыдырысовтар отбасы иеленді. Ал үшінші орынды Саран қаласының атынан бақ сынаған Қуат және Приозерск қаласынан қатысқан Қоныспаевтар отбасылары өзара бөлісті.
Жеңімпаздар мен жүлдегерлерге грамоталар, естелік сыйлықтар мен сертификаттар табыс етілді. Бұдан бөлек, конкурсты ұйымдастырушылар үздік шыққан отбасыларға тұрмыстық техникаларды сыйға тартты.
Марапаттау рәсіміне облыстық ішкі саясат басқармасының басшысы Ерлан Құсайын, белгілі меценат, облыстық мәслихаттың депутаты, «Алтын жүрек» Ұлттық сыйлығының иегері Бекзат Алтынбеков, облыстық аналар кеңесінің мүшесі, білім саласының ардагері Күліш Төлеуханова және басқа да құрметті қонақтар қатысып, «Мерейлі отбасы-2021» байқауының жеңімпаз отбасыларына жылы лебіздерін білдірді.
Қарағанды облысы
