ӨМІРДІҢ ӨЗІ АЙҚЫНДАП БЕРДІ

1996 жылы Президент Жарлығымен 1 Мамыр елімізде Қазақстан халқының бірлігі күні мерекесі деп аталатын болды. Көктем мерекесін ерекше атап өту, жылы жүзбен көшеде кездесу, достарыңмен бірге болу сияқты кеңестік кезеңнен бастау алатын игі дәстүр тәуелсіздігін алған еліміз үшін де өзінің маңызын жойған жоқ. Біз көпэтносты болсақ та, жер мен ел ор­тақ, ойымыз бір жерден шығып отыр. Мере­ке кезінде ел тұрғындары кездескен кезде олар бір-бірін құттықтап қана қоймай, отба­сына, еліне және жеріне деген сүйіспенші­лігін де паш етеді. Қысқасы, 1 Мамыр – ха­лықтың басын қосатын, әр түрлі фестиваль­дермен, ән және бимен көмкерілген ерекше мереке. Өскемен қаласы әкімінің орынбаса­ры болған кезімде ерекше тебіреніспен осы мерекені атап өтуге дайындалатынмын. Өйткені, бұл – елдің ерекше әспеттейтін мерекесі. Еліміздегі әр этностың әні мен сазы, мың бұралған биі үйлесімділік тауып, келісім мен бейбіт өмірге үндейді. Осы жерде Елбасының ел халқының жай-күйін сезіне алатын ерекше қасиеті барлығын да тілге тиек еткім келеді. Мерекенің Қазақстан хал­қы­ның бірлігі мерекесі күні деп аталуының өзі халықтың көңіл-күйін  дөп сезіне білу деп түсінген жөн. Мемлекет өзара сенім мен құрметке лайық өмір сүруді қамтамасыз ете білсе, сол сенімнен шығуды сенен де күтеді. Елімізде Қазақстан халқы Ассамблеясы Мемлекет басшысының көрегендігінің, алысты болжай алатынының арқасында жүзеге асты. Ассамблея барлық этностың филосо­фиялық өмірінің ағысы іспетті. Этносаралық қарым-қатынастар институты бір-біріңді сыйлауға, өзара түсінісуге  ғана емес, соны­мен қатар, әрбір этнос пен жеке адамның ішкі жандүниесін тануға да үйретеді. Ортақ істе бір-бірімізге кешіріммен қарауға, әрі-беріден соң бір-бірімізді құрметтеуге шақырады. Яғни, қоғамдағы адамдар қарым-қатынасының үйлесімділігіне үндейді. Олай болса, Ассамблея этносаралық қарым-қатынастардың дамуына, халықтың бірлігін сақтауға ерекше үлес қосып келеді деп толық сеніммен айтуға болады. Этносаралық қарым-қатынастарды тереңдету тек киім киіп, ән айту ғана емес, ол қазіргі заманғы мемлекеттілікті құру да болып табылады. Мемлекеттілікті қалыптастыру жастардың аға ұрпаққа қалай қарайтындығымен де анықталады. Жастар отбасылық, мемлекеттік дәстүрлер арқылы Қазақстанда өзінің орнын табуға ұмтылуы тиіс. Бұл – өте маңызды. Жүргізіліп жатқан реформалардың жетіс­тігі туралы көп айтамыз. Былай қарасаңыз, сол реформалар халықтың жағдайын жақсар­туға бағытталған. Әл-ауқаттың жақсаруы маған бере қал емес, мен мемлекеттің өркен­деуіне нендей үлес қоса аламын деген пайымнан туындағаны жөн. Тағы бір айта кетерлігі, Мемлекет басшысы мемлекеттік тілдің маңызын ашып көрсетті. Мемлекеттік Әнұран мен Мемлекеттік Ту сияқты мемле­кеттік тілде еліміздің символы болып табыла­ды. Тілдердің “үштұғырлығын” ұстанып келе жатқан біздерді әлемде өркениет көшіндегі елдер санатында қабылдайды. Жастардың көп тіл білуі мені қуантатыны да рас. Мемле­кеттік тіл керек пе деп қазір ешкім талқыламайды, өйткені, ол біздің өміріміздің мәніне айналып үлгерді. Өмірдің өзі біздің осы тілді ұстанатынымызды айқындап берді. Кез келген тілді білу – үлкен байлық. Светлана ФЕРХО, Мәжіліс депутаты.