– Бұл маусымға жарқын премьералар, гастрольдік өнер көрсетулер жоспарланған, сонымен қатар репертуарымыздағы көрермен көзайымына айналған сүбелі спектальдер міндетті түрде орындалады. Біз алғаш рет демалыстан кейін балет труппасының толық құрамымен жұртшылыққа есігімізді ашамыз, бұл үшін шытырман оқиғалы тақырыпқа құрылған, қабылдауға жеңіл «Корсар» балетін таңдап алдық. Барлық әртістер көрермендермен қауышатын күнді асқан ыждаһаттылықпен асыға күтуде. Осы маусым ауқымды да мазмұнды болады деген үміттеміз, – деп пікірімен бөлісті Алтынай Асылмұратова.
17 қыркүйек күні Бирбантоны өнерсүйер қауымға Олжас Маханбетәлиев ұсынады. Театрдың жетекші солистері: Қазақстанның еңбек сіңірген қайраткерлері Әнел Рүстемова мен Гаухар Усина (Медора), Олжас Тарланов, Арман Оразов (Конрад) және Қазақстанның еңбек сіңірген қайраткері Еркін Рахматоллаев (Құл Али) өздерінің жарқын партияларын ортаға салады.
Байронның аттас поэмасының желісімен жасалған классикалық балет репертуарының жауһары оның романтикалық жайма-шуақтығын, еркіндік сүйгіш рухын, күшті құштарлығын сақтайды. Теңіз қарақшылары – корсарлардың өмірінен алынған оқиғалар желісіне арналған туынды әртістерге барлық партияларда балет техникасымен де, драмалық дарынымен де жарқырай өнер көрсетуге мүмкіндік береді. 1856 жылы қаңтарда Парижде өткен премьераға көрермендер билеттерді 1,5 айдан астам уақыт бұрын сатып алуға тура келді. Қойылымның жетістігі өте зор болды, ал сахналық әсерлері театрлық қойылымдар тарихындағы ең үздік деп танылды. Әлемдік премьерадан бері «Корсар» балеті өзінің танымалдылығын жоғалтқан жоқ.
«Егемен-ақпарат»
