Кино • 15 Қыркүйек, 2021

Трилогияның екінші бөлімін түсіріп жатыр

185 рет
көрсетілді
3 мин
оқу үшін

Бұқаралық ақпарат құралдарының өкілдері Алматы мектептерінің бі­рін­де түсіріліп жатқан «Хардкор» фильмінің (шартты атауы) түсірілімде­­ріне барып қайтты. Ол үшін фильмнің түсіру командасы арнайы баспа­сөз-турын ұйымдастырған болатын.

Трилогияның екінші бөлімін түсіріп жатыр

«Ұлттық киноны қолдау мемле­кет­тік орталығы» КеАҚ тапсырысы бойынша режиссер Фархат Шари­пов түсіріп жатқан трилогияның екін­ші бөлімі – «Хардкор» фильмі бү­гінгі жасөспірімдердің өмірінен сыр шер­теді. Жаңа фильмде режиссер бүгінгі күнгі нашақорлық дерті тақырыбын да қозғамақ.

– 2019 жылы ҰКҚМО ұйымдас­тырған сценарийлер байқауында осы жобаны ұсындық, кейін қаржылай қолдауға ие болдық. Бұл туынды «18 килогерц» фильмінің концептуал­ды жалғасы. Картинадағы басты кейіп­керлер – жасөспірім қыздар, – деді режиссер және сценарий авторы Фархат Шарипов.

Басты рөлде ойнайтын актрисаны табу оңайға соқпады. Бір­неше айға созылған кастинг барысында көптеген үміткердің іші­нен басты рөлге Халықаралық бизнес және ком­муникация колледжінің екінші курс студенті Виктория Рома­нова бе­кітілген болатын.

– Киноға алғаш рет түсіп жатырмын. Бала кезімде мен де басқалар сияқты актриса болғым келді, бірақ та ешқайда бармадым. Кастинг туралы құрбымнан есті­дім. Онымен бірге келіп, суретке түс­тім. Бірнеше апта өткен соң маған хабар­ласып, бас­ты рөлге бекітілгенім ту­ралы айтты. Шынымды айтсам, бір­ден сенбедім. Оны естіген менің әжем қатты қуан­ды. Өйткені режис­сер Фархат Ша­ри­повтің шығар­машылығымен жақ­сы таныс екен, тіпті оның барлық филь­м­ін біледі. «Қызғылт қоян туралы хикая» – әжем­нің ең жақсы көретін фильмі, – деді жас актриса.

Айта кетсек, фильмнің түсіру жұ­мыс­тары былтыр күз айында бас­тал­ған болатын. Картинаның про­дю­­сері Дина Жұмабектің айтуы­на қара­ғанда, еліміздегі эпидемия­лық жағ­дайға ­бай­ланысты түсірі­лім­­дер бірнеше рет бас­қа күнге ауыс­тырылған екен.

Алайда пандемияға байланысты орын алған қиындыққа қарамастан, кәсіби мамандардан тұратын фильм­нің түсіру тобының құрамы өзгерген жоқ. Фильмнің қоюшы операторы – Александр Плотников. Ол Фархат Ша­риповтің көптеген фильмінде бір­ге жұмыс істеген. Сондай-ақ фильм­­нің қоюшы суретшісі Алексей Шин­­дин де көп уақыттан бері ре­жиссер­мен бірге жұмыс істеп келеді. Бүгінгі түсірілімге Шиндин бастаған суретшілер тобы гүлдеп тұрған алма ағашын арнайы дайындады.

Продюсердің айтуына қарағанда, фильмнің түсіру жұмыстары жақын күн­дері аяқталып, пост-продакшн жұ­мыс­тары (монтаж, дыбыс жазу жә­не тү­сірген материалды өңдеу) бас­та­лады.

Фильмнің прокаты туралы әлі еш­қандай ақпарат жоқ. Кино­туындының продюсері халықаралық дистрибью­тор­лармен келіссөздер жүргізіп жат­қа­нын хабарлады.

 

«Егемен-ақпарат»