Қазақстан Президенті жанындағы Орталық коммуникациялар қызметінде Қазақстан халқы Ассамблеясы өкілдерінің, депутаттардың, қоғам қайраткерлерінің қатысуымен Елбасы Жолдауында айтылған міндеттер жайы талқыланған брифинг өтті.
Қазақстан Президенті жанындағы Орталық коммуникациялар қызметінде Қазақстан халқы Ассамблеясы өкілдерінің, депутаттардың, қоғам қайраткерлерінің қатысуымен Елбасы Жолдауында айтылған міндеттер жайы талқыланған брифинг өтті.
Орталық коммуникациялар қызметінің ресми өкілі Алтай Әбибуллаев: «Қазақстан халқы Ассамблеясы қазақ жерінде мекендеген көптеген ұлттың өкіліне ұйытқы болып отыр», дей келе, еліміздің Еуропадағы қауіпсіздік және ынтымақтастық ұйымына төрағалық етуі барысында Ассамблея моделіне шынайы қызығушылық танытылғанын жеткізді. «Мемлекет басшысы өзінің биылғы Жолдауында Қазақстан халқы Ассамблеясы алдына «Мәңгілік Ел» патриоттық актісін әзірлеу және қабылдау жөнінде нақты тапсырма қойған болатын. Бұл орайда, Президент барлық саяси партияларды, қоғамдық бірлестіктерді және барша қазақстандықтарды «Қазақстан-2050» Стратегиясының басты мақсаттарына жету жолындағы жұмыстарға белсене араласуға шақырды», деді.
Брифингте сөз алған Л.Н.Гумилев атындағы Еуразия ұлттық университетінің этносаралық және дінаралық толеранттылық жөніндегі ЮНЕСКО кафедрасының профессоры Әділ Ахметов: «Біз Қазақстан халқы Ассамблеясының елдің бірлігін, татулығын үйлестіріп отырған үлкен, әлемде теңдесі жоқ ұйым екенін айтып отыруымыз керек. Жақында Л. Н. Гумилев атындағы Еуразия ұлттық университетінде ЮНЕСКО кафедрасы ашылды. Бұл кафедраның аты да, заты да Қазақстан халқы Ассамблеясының мүддесімен сай келеді. Мен 5-6 жыл Парламент Сенатында депутат болған кезімде Ассамблея жұмысына жиі қатысып жүрдім. ЕҚЫҰ Төрағасының жеке уәкілі болып, осы ұйымға кіретін 57 мемлекеттің тең жартысын аралап шықтым. Сол кезде көңілге ұялаған, мақтанышпен айтатын бір мәселе – біздің еліміздегі тұрақтылықтың, қоғамдық келісімнің іргетасы, ұлттық саясаттың іргетасы – Қазақстан халқы Ассамблеясы», деген пайымын жеткізді.
Ол құрылғанына 20 жылдай уақыт болған Ассамблея туралы қоғамда әртүрлі пікірлердің туындағанын, «оның не керегі бар» деушілердің де кездескенін айтып өтті. «Бұл үлкен түсініспеушіліктен туған дүние деп айтар едім. Алайда, қашанда біткен іске сыншы көп. Ел тұрақтылығы өз-өзінен бола қойған жоқ. Соны түсіну керек. Бір айта кетерлігі, Ассамблеяның өткен жылғы сессиясында жария етілген «Бір халық – бір ел – бір тағдыр» ұстанымының биылғы Жолдаудан да көрініс тапқанына куә болып отырмыз.
Біздің халқымыздың керемет құндылығы бар: «Алтау ала болса, ауыздағы кетеді. Төртеу түгел болса, төбедегі келеді». Бұл мәтелдің аясы өте кең. Осы сөзді жеке отбасына да, тіптен, қазіргі егемендігін алған алты түркі тілдес мемлекеттерге де қатысты айтса болады. Мұны 130-дан астам ұлттан тұратын елімізге қатысты айтсақ та артық емес. Демек, алауыздық болатын болса, ол елдің бірлігі кетеді, бірлігі кеткен мемлекеттің тұтастығы, бейбітшілігі кетеді, ол мемлекеттің дамуы да өз-өзінен тоқтайды. Мынадай алмағайып заманда бақ болып, басымызға қонған құндылығымызды уысымыздан шығарып алсақ, ол ешқашан қайтып оралмайды. Сондықтан да ұлттық идея керек. Ұлттық идея – ол «Қазақстан-2050» Стратегиясы. Ұлттық идея – Мәңгілік Ел болу. Президент, міне, осыны бүкіл халыққа паш етті. Бұл адамның көкейіне қонатын дүние», – деді Ә.Ахметов.
Қазақстан Президенті жанындағы Мемлекеттік басқару академиясы Этносаралық және конфессияаралық қатынастар орталығының жетекшісі Айгүл Сәдуақасова «Қазақстан-2050» Стратегиясы «Мәңгілік Ел» патриоттық актісіне негіз болатынына тоқтала келе, бұл идея сандаған ғасырлар бойы жинақталып, бүгінгі заманға дейін жалғасып келе жатқан негізгі қағидаттардың болуымен маңызды екенін атап өтті. Ал Қазақстан Парламенті Сенатының депутаты, «Қазақстанның орыс, славян және казактар ұйымы ассоциациясы» қоғамдық бірлестігі төрағасының орынбасары Анатолий Башмаков «Мәңгілік Ел» ұлттық идеясы жайлы өз пікірін білдірді. Ол: «Мен Президенттің барлық жолдауларын, 10 ұсынысы мен «Мәңгілік Ел» идеясының 7 тұжырымдамасын формула ретінде, қолданбалы және дүниетанымдық құжат ретінде топтастырар едім», дей келе, «Мәңгілік Ел» қазақ жерін мекендеген барлық этностар мәдениетін өзара тең деңгейде дамытудан туған ізгі идея деген ойын жеткізді. «Демек, бұл – біздің барлығымызды жұмылдыруға тиісті ұлттық идея, ұлттық идеология болуы тиіс», деді ол бұл ретте.
Брифингте Қазақстандағы болгар этномәдени бірлестігінің төрағасы Олег Дымов та сөз алып, Елбасының Жолдауында айтылған мәселелер мемлекетті алға жылжытуда алғышарт бола алатынын жеткізді.
Ләйла ЕДІЛҚЫЗЫ,
«Егемен Қазақстан».
