Медицина • 16 Қыркүйек, 2021

Патогенді биологиялық нысандар ескертусіз тексерілуі мүмкін - Ерлан Қиясов

30 рет көрсетілді

ҚР Денсаулық сақтау вице-министрі – Бас санитар дәрігер Ерлан Қиясов Мәжіліс депутаттарының алдында «Қазақстан Республикасының биологиялық қауіпсіздігі туралы» заң жобасын таныстырды, деп хабарлайды Egemen.kz.

Әуелі биологиялық қауіпсіздік саласындағы кемшін түсіп жатқан тұстарды атаған вице-министр ұсынылып отырған құжаттың ең негізгі нормаларына тоқталды.

«Патогенді биоагенттермен жұмыс істейтін субъектілердің мемлекет тарапынан тиімсіз бақылануы биоагенттердің уақтылы профилактикасын жүзеге асыруға мүмкіндік бермейді. Бұған тиісті нысандардың тексерумен төмен деңгейде қамтылуы және ондай тексерулердің алдын ала хабарлау арқылы жүргізілетіні себеп болып отыр. Бұған дейінгі тәжірибеге сүйенсек, жосықсыз зертханалар өз қызметін аса қауіпті патогендермен жұмыс істеуге тиісті рұқсатын алмастан жүзеге асыратынын көрсетті. Олар нысанда тексеру болатынын алдын ала білгендіктен, дәл тексеру алдында заңда тыйым салынған заттарды жойып үлгереді», дейді Ерлан Қиясов.

Оның айтуынша, аталмыш норма биологиялық нысандарға жүргізілетін тексерулердің қолданыстағы санын көбейтуді көздемейді.

«Ұсынылып отырған негізгі заң жобасында мемлекеттік бақылау объектілерін тәуекел деңгейіне қарай жіктеу көзделген. Ал ілеспе заң жобасында патогендігі I және II санаттағы биоагенттермен жұмыс істейтін ұйымдардың тексеруден өтетіні туралы алдын ала хабардар ету тетігі алып тасталады. Бұл қауіпті биологиялық объектілерде биоқатерлерді алдын ала анықтауға және болдырмауға мүмкіндік береді», деді Ерлан Қиясов.

Сондай-ақ, ведомство өкілі биологиялық қатері бар заттармен жұмыс істейтін орындардың жауапкершілігін арттыру бойынша нормалар дайындалғанын еске салды.

«Қолданыста бар заңнамадағы үйлесімсіздіктер саладағы талаптардың төмен деңгейде орындалуына әсер етуде. Осыған байланысты ілеспе заң жобасында қауіпті патогендерді заңсыз қолданғаны, өткізгені және ұрлағаны үшін, соның салдарынан ауыр зардаптарға әкеп соқтырғаны үшін қолданылатын шараларды қылмыстық жауапкершілікке дейін күшейту ұсынылған», деді вице-министр.

 

Соңғы жаңалықтар

Алматы тұрғындары сусыз қалды

Аймақтар • Бүгін, 15:57

Канелоны ауыр шайқас күтіп тұр

Кәсіпқой бокс • Бүгін, 12:18

Ұқсас жаңалықтар