Қазіргі таңда Қазақстанда 5-7 венчурлық қор белсенді жұмыс істеуде. Бұл ретте стартаптардың инвестицияларға қажеттілігі ұсыныстан асып түседі.
«Қазақстанда отандық венчурлық инвестициялау саласы әлі қалыптасу сатысында. Бұл бағытты дамыту ынталандыруды қажет етеді. Сондай-ақ жеке венчурлік инвесторлардың құзыреттерін де дамыту қажет», дейді Astana Hub басқарушы директоры Аркадий Селезнев.
Жыл сайын Қазақстанда IT саласында жаңа стартап жобалар саны өсуде. Атап айтқанда, бүгінгі таңда еліміздің ең ірі технопаркі Astana Hub резиденттері сапында 500-ден астам стартап бар, ал жалпы алғанда, Astana Hub-тың түрлі бағдарламалары арқылы 2018 жылдан бастап 10 мыңнан астам адам өтті. Жастар перспективалы бағытта даму, икемді жұмыс кестесі және пікірлестер командасымен жұмыс істеуді ұнатады.
Әрбір стартаптың дамуындағы маңызды кезең – қаржыландыруды тарту. Инвестициялар пайдаланушылардың нақты мәселелерін шешу үшін IT-өнімді жақсартуға, пайдаланушылар базасын ұлғайтуға және болашақта қажетті пайда алуға көмектеседі. Инвестициялар команданың жалақысын, әкімшілік және басқа шығындарды төлеуге мүмкіндік береді.
Инвестициялық сауаттылық деңгейін арттыру және стартаптарды дамыту үшін қолайлы орта құру мақсатында Astana Hub тұрақты негізде VC School оқыту курсын өткізеді. Мәселен, биыл 28 қыркүйекте Алматыда мектептің бесінші легі басталады, онда табысты венчурлік инвесторлар және бизнес-періштелер стартаптар мен IT-компаниялармен инвестициялау дағдылары туралы өз білімдерімен бөліседі.
Бағдарлама венчурлік инвестициялардың негізгі мәселелерін, сала трендтерін, заңдық аспектілерді қамтиды.
Жалпы, өткен төрт ағым ішінде Astana Hub қазірдің өзінде 116 кәсіпкерді, жаңадан бастаған инвесторларды және ірі компаниялардың басшыларын инвестициялау дағдыларына үйретті. Биылғы білім беру курсына қатысуға 180-нен астам өтінім алынды, қазіргі уақытта олардың өтінімдеріне скрининг жүргізілуде.
«Егемен-ақпарат»
