Тәуелсіздіктің 30 жылдығы • 17 Қыркүйек, 2021

Жас қобызшылар бақ сынады

17 рет көрсетілді

Алматыда қала күніне және Тәуелсіздіктің 30 жылды­ғына орай жасөспірімдер арасында тұңғыш рет «Қобыз сарыны» республикалық байқауы өтті.

Қоңыр үнді әлдилеген үкілі үміткерлер баба мұрасын жаң­ғыртып, өзара бақ сынады. Сайыстың гала концерті «Алатау» дәстүрлі өнер театрын­­да шымылдығын түріп, же­ңім­паздар мен жүлдегерлер ел ал­дында марапатталды. Байқау қорытындысы бойынша бас жүлде 13 жастағы Баян Жанахметоваға бұйырды. Өз ойымен бөліскен жас өнерпаз, бай тембрлі аспапты жоғары деңгейде меңгеріп, қобыздың тасасындағы тылсым сырдың тереңіне бойлағысы келетінін жеткізді.

«Ұлттық мәдениетіміздің жауһарына баланатын қобыз аспабы ғасырды ғасырға жал­ғап, сазды сарынын үзбей, хал­­қымыздың қуанышы мен мұ­ңын жеткізіп келеді. Іс-ш­а­­раның басты мақсаты – ұлт­тық өнерімізді насихаттау, ға­сырлар қойнауынан сыр ше­р­тетін дала үнін жастарға тә­лімдік тағылымы мол дүние ретінде дәріптеу», дейді Алматы қалалық Мәдениет басқармасы басшысының орынбасары Данияр Әлиев.

 Байқауға қазылық еткен прима-қобызшы Ғазиза Ғабрахимова соңғы жылда­ры жас таланттар шоғыры көбей­генін және ұлттық орын­дау­шылардың деңгейі өсіп келе жатқанын айтады. Оған дәлел байқауда өнер көрсетуге еліміздің түкпір-түкпірінен жүздеген жас қобызшы ниет білдірген. Көненің көзіндей болған аспапты дәріптеу рухани жаңғырудың өзегі екенін алға тартқан ұйымдастырушылар іс-шараны дәстүрлі түрде өткізіп тұруға ынталы екендерін білдірді.

 

АЛМАТЫ

 

Соңғы жаңалықтар

Ұқсас жаңалықтар