Кардиология және ішкі аурулар ғылыми-зерттеу институтының басқарма төрағасы, медицина ғылымдарының докторы, профессор Роза Қуанышбекованың айтуынша, медицина қарқынды дамыған сайын дәрігердің жұмысы үнемі жаңа технологияларды, диагностика мен емдеудің жаңа әдістерін меңгеруді талап етеді.
«Симуляциялық технологияларды қолдану оқу үдерісін тиімді етуге мүмкіндік береді. Бұл – оқытушылар мен дәріс алушылардың межеленген нәтижеге қауіпсіз қол жеткізуінің төте жолы. Әсіресе пандемия кезінде мұның көмегі зор. Бұл технологияларды қызметкерлердің біліктілігін арттыру процесіне енгізу – объективті қажеттілік», дейді Роза Тоқтанәліқызы.
Жүрек ауруларын індете зерттейтін институтта қызмет ететін жүрек-өкпе реанимациясы, интервенциялық кардиология және аритмология симуляция орталықтары, сондай-ақ гибридті зертханалар резиденттер мен дәрігерлердің теориялық және практикалық дағдыларын меңгеруге айрықша серпін берген.
«Білім алушылардың Simbionix ANGIO Mentor Suite симуляторында эндоваскулярлық араласулардың дағдыларын меңгеруге мүмкіндіктері бар. Бұл – нақты уақыт режімінде рентгеноскопияның бақылауымен орындалатын эндоваскулярлық процедуралардың компьютерлік медициналық симуляторы. Ол ангиография, ангиопластика және стенттеу секілді эндоваскулярлық процедураларды жүргізудің жеке немесе командалық жаттықтыруын ұсынады», дейді рентгеноэндоваскулярлық операция блогының меңгерушісі, интервенциялық кардиолог, рентгенхирург Алексей Колесников.
Жүйенің анатомиялық құрылымдарды шынайы 3D көрсету және интервенциялық құралдарды пайдалана отырып процедураларды шынайы имитациялау және тактильді сезімдер жасау қабілеті бар. Simbionix ANGIO Mentor коронарлық араласулардың негізгі дағдылары жөніндегі модульді қамтиды, онда жүрек тамырларын стенттеу кезіндегі асқынулар бойынша симуляциялық бағдарламалар, асқынулармен күресудің практикалық дағдыларын әзірлеу және жіті коронарлық синдром кезіндегі интервенциялық араласулар енгізілген.
Мұндағы дағдарыстарды зерттеу орталығының (Литва, Каунас қаласы) қолдауымен құрылған гибридті зертхана өз тиімділігін көрсеткен. Дағдарыстарды зерттеу орталығы әзірлеген оқыту әдістемесі білімді тез және тиімді таратуға, сондай-ақ персоналдың практикалық дағдыларын тәжірибеде қолдануға мүмкіндік береді. Тәулік бойы тынымсыз жұмыс істеуге қауқарлы зертхана мамандардың практикалық дағдыларын қалыптастыру деңгейін арттыра түскен.
Кардиология кафедрасының басшысы, медицина ғылымдарының кандидаты Айсұлу Мұсағалиеваның айтуынша, барлық сабақ бейнетаспаға жазылып, процесті арнайы нұсқаушы бақылап отырады. Курс аяқталғаннан кейін қорытынды тапсырма беріліп, таспаға жазылған жұмыс нұсқаушы тарапынан бағаланады. Мамандардың пікірінше, гибридті зертхана базасында өтетін «Жедел кардиологиялық көмек», «Мамандандырылған реанимациялық көмек», «Бастапқы бағалау және COVID-19 инфекциясы бар пациенттерді емдеу» және т.б. тақырыптағы курстар да өз тиімділігін көрсеткен.
