Бизнес • 23 Қыркүйек, 2021

Кәсіпкерге жер бермей, жігерін құм қылады

61 рет көрсетілді

Мемлекет басшысы Қасым-Жомарт Тоқаевтың Қазақстан хал­қына Жолдауында пандемия зардабы, әсіресе шағын және орта бизнеске ауыр тиіп отырғаны айтылды. Бүгінгідей күрделі кезеңде кәсіпкерлердің жұмысына кедергі келтіру мемлекетке қарсы жасалған ауыр қылмыс ретінде бағалануы керектігін ескерткен Президент: «Кәсіпкерлер шенеуніктер тарапынан заңсыз қысым көрсе, бірден прокуратура органдарына жүгінгені жөн», деді.

Мемлекет басшысының осы тапсырмасын басшылыққа алған Қостанай облыстық кәсіпкерлер палатасы жанындағы қоғамдық кеңесте жуырда бизнесін дамы­ту мақсатында жер телімін алу­ды межелеп қойған, бірақ бю­рократиялық кедергілердің ке­сірінен оған жылдан астам уақыт қол жеткізе алмай қажыған кәсіп­керлердің шағымдары қаралды. Нә­ти­жесінде, кәсіпкерлер құ­қын қорғау және сыбайлас жем­қорлыққа қарсы күрес жөніндегі қоғамдық кеңес жер аукционда­рын өткізуді созбаққа салатын ше­неуніктерді әкімшілік жауап­кершілікке тарту туралы ұсыныс әзірлеу керек деген қорытындыға келді. Өйт­кені соңғы жылдары бизнес­ке жерді пайдалануға беру мәсе­ле­сінде Қостанай қалалық әкімдігі тарапынан заңға қай­шы әрекет­тер мен әрекетсіздіктер жиі орын ала бастаған. Төтесін айтсақ, қос­танайлық кәсіпкерлер үшін бос жатқан жерді алу қиямет болып кеткен. Көздеген жерін алу үшін кәсіпкерлер әкімдікке қайта-қайта арыз жазып, одан еш нәтиже шығара алмай әлек. Жер кодексі бойынша жерді кәсіпкерге бөліп беруден бас тартқан соң, әкімдік жер телімін 90 күннің ішінде аук­цион арқылы саудалауы керек екен. Бірақ даулы жерлерге қа­тысты мұндай аукциондар көбіне өтпей қалады.

Әкімшілік кедергінің кесірінен кәсіпкерлердің бизнеске берілетін жерге қол жеткізе алмай жүргенін облыстық кәсіпкерлер палатасы директорының орынбасары Самат Сәдуақасов та айтты.

– Біз Қостанай қалалық прокуратурасымен бірлесіп әкімдіктің Жер кодексі нормаларын сақтау мәселесін зерделеп шықтық. Мә­се­лен, Қостанай қаласының әкім­ді­гі 2021 жылдың 31 мамырында жеке кәсіпкер А.Төлендинге үш жер телімін беруден бас тар­ту туралы қаулы шығарған. Мұны­сын телімдердің үшеуі де аукцион арқылы берілетіндігімен тү­сіндірген. Жер кодексі бо­йынша аукцион өткізу мерзімі 31 тамыз­да аяқталды. Алайда әкімдік күні бүгінге дейін кәсіпкерге бе­­ру­ден бас тартқан жерлердің еш­қай­сысын саудаға салған жоқ. Осыған ұқсас заң бұзу әрекетте­­рі тағы екі кәсіпкердің шағымы бо­йын­ша анықталып отыр, – деді С.Сәдуақасов.

Ал Basadato жауапкер­ші­лі­гі шектеулі серіктестігі аумағы 3 гек­тар болатын жер теліміне бір жыл бойы қол жеткізе алмай келеді. Серіктестік жер бөлу туралы өтінішті былтыр берген. Бірақ әкімдік жер аукционын өткіземіз, соған қатысасыз деген уәде беріп, уақыт созып жіберген. Аукционды күте-күте шаршаған кәсіпорын бас­шылары биыл сәуірде екінші қайтара өтініш береді. Алайда бұл өтініш те қанағаттандырылмай, кәсіпкерлердің тағы таулары ша­ғылды. Әкімдік бұл жолы кәсіп­орын сұраған жерде құрылыс көп жүріп жатыр, инженерлік желілер реттелмеген деген себепті алға тартқан. Бұдан кейін серіктес­тік мамандандырылған сотқа шағым береді. Сот жерді бермеу туралы қаулыны заңсыз деп танып, әкімдікті өздері жіберген олқылықтың орнын толтыруға мін­деттеп отыр.

Жер қатынастары саласын­да мұндай мәселелер жиі туындап ­жататынын әкімдіктегілердің өздері де жасырмайды. Кә­сіп­керлерді негізсіз әуре-сарсаңға түсіріп қойған олқылықтың басты себебі көбіне-көп адам факторына, нақтырақ айтқанда, әкімдіктегі маман тапшылығына байланысты көрінеді.

– Мәселе былай: алдымен Қостанай қаласы әкімінің аты­­на аукцион өткізу туралы өті­ніш келіп түседі. Оған жер қа­тынастары бөлімі қол қоя­ды. Әрі қарай өтінішті сәулет бөлі­міне келісім беруге жібереміз. Биыл біздің бөлімге 200-дей өті­ніш келіп түсті. Оның шамамен 150-дейіне сәулет бөлімі келісім бермеді. Кейбір өтініштер әлі де қаралып жатыр. Бұл бөлім көптен бері кадр тапшылығынан ақсап келеді, мамандар жетіспейді, биыл жыл басталғалы бөлім бас­шысы болмай келген. Өті­ніштерді қарау уақытының созылып кеткен себебі – осы. Бірақ жауапкершілікті біздің мойнымыздан ешкім алып тастаған жоқ, – деген жер қатынастары бө­­лімінің жаңа басшысы Бақтияр Жұмабеков алдағы уақытта өті­ніштерді қарау мерзімін барынша қысқартуға уәде етті.

Өтініштердің қаралу мерзімін созған шенеуніктер қазір әрі кетсе, тәртіптік жазаға ғана тартылады, ал өтініш берген кәсіпкер үшін әр күн қымбат. Қоғамдық кеңес осыны ескере отырып, мұндай аукциондарды заңда белгіленген мерзім ішінде өткізбеген мемлекеттік қызметшілерді әкімшілік жазаға тарту туралы ұсыныс әзірлеу керек деген ұйғарымға келді. Бұл ұсыныс «Атамекен» ұлттық кә­сіп­керлер палатасының орталық ап­паратына қарауға жіберілді.

 

Қостанай облысы

 

Соңғы жаңалықтар

Алматы тұрғындары сусыз қалды

Аймақтар • Бүгін, 15:57

Канелоны ауыр шайқас күтіп тұр

Кәсіпқой бокс • Бүгін, 12:18

Ұқсас жаңалықтар