Олардың бірі – Жезқазған қаласындағы өнер мектебінің сегізінші сынып оқушысы Аяла Қуаныш «Жас суретші» аталымы бойынша бірінші жүлдені жеңіп алса, Қарағандыдағы №2 лицейдің оқушысы Яна Иваночкина «Коллаж» жанры бойынша екінші орынды иеленді.
«Сарыарқа дарыны» балаларға арналған қосымша білім беру аймақтық ғылыми-практикалық орталығының әдіскері Гүлназ Мананбаева екі жас суретшінің де болашағы зор екенін айтады.
«Аталған байқауға облысымыздан сегіз суретші қатысты. Ал Аяла мен Яна ұсынған жұмыстардың шынында да жоғары талғаммен орындалғанын айта кеткен жөн. Алдағы уақытта біз дарынды өрендердің шығармашылығын жіті қадағалайтын боламыз», дейді ол.
Биылғы байқау Тәуелсіздіктің 30 жылдық мерейтойын атап өту аясында ұйымдастырылып, үміткерлер өз туындыларын «Тәуелсіз Қазақстан – балалар көзімен» ұраны бойынша ұсынғанын айта кеткен ләзім.
Жалпы, аталған өнер сайысына еліміздің түпкір-түпкірінен 136 жас суретші қатысқан болатын. Байқауда жеңімпаз және жүлдегер болған таланттар дипломдармен және арнайы сыйлықтармен марапатталды.
