«Осы жылдың 24 қыркүйегіндегі мәліметке сәйкес, өткен тәулікте КВИ-дің 137, оның ішінде өкпе қабынуының 9 жағдайы анықталды. Жалпы, пандемия басталғаннан бері облыста 32 130 ресми расталған жағдай тіркелді. Оның ішінде өкпе қабынуы – 3 447. Бүгінде 29 605 науқас жазылып шықты.
Өкінішке қарай, пандемия басталғаннан бері 529 адам қайтыс болды. Қазіргі таңда инфекциялық ауруханаларда 658 адам, оның ішінде жансақтау бөлімшесінде 84 науқас ем алуда. Карантиндік станционарда 4 адам жатыр. Бүгінде ауруханаларда ем алып жатқан жүкті әйелдер саны – 51. Оның ішінде реанимацияда 9 адам бар. Сонымен қатар 62 жүкті әйел үйден емделуде», деді ол Орталық коммуникациялар қызметіндегі брифинг барысында.
Өңір басшысы бірінші орынбасарының дерегінше, 2021 жылдың 1-23 қыркүйегі аралығында облыс бойынша мектеп жасындағы балалар арасында коронавирус инфекциясының 489 жағдайы тіркелген. Оның ішінде Ақтөбе қаласында - 362, облыс аудандарында 127 бала ауырып жатыр.
«Бүгінгі таңда коронавирус инфекциясы анықталған 123 мектепте 473 сынып қашықтан оқу форматына көшіріліп, үй карантиніне оқшауланды. Облыста карантинге жабылған ауысымдар мен мектептер жоқ. Осы жылдың 1-23 қыркүйегі аралығында педагогтар арасында КВИ-дің 53 жағдайы тіркелді. Облыста мұғалімдер мен оқушылар арасында КВИ бойынша күнделікті мониторинг жүргізіледі. Сонымен бірге барлық білім беру нысандарында санитарлық нормаларды сақтау бойынша қатаң талап сақталады», деді Руслан Хамбаров.
