Аймақтар • 26 Қыркүйек, 2021

Облыс орталығының дені ауыз сусыз отыр

124 рет көрсетілді

Көкшетау қаласының бірнеше шағын ауданы ауыз сусыз отыр. Қала басшыларының уәжі – Сергеевка су қоймасынан тартылған су құбыры жөнделуде. Жергілікті биліктің ақтала айтқан мәліметіне қарағанда, қыркүйек айының соңына дейін су берілмейтін сыңайлы.

Байқал БАЙӘДІЛ

Қала ауыз сумен Шағалалы және Сергеевка су қоймалары арқылы қамтамасыз етіледі. Шағалалы су қоймасынан тәулігіне 15 мың текше метр, Сергеевка су қоймасынан 20 мың текше метр су алынады.

– Қазір Сергеевкадан тартылған су құбырына апаттың алдын алу бағытындағы жөндеу жұмыстары жүргізіліп жатыр, – дейді қала әкімінің орынбасары Бауыржан Ерназаров. – Сол себепті Жайлау және Сарыарқа шағын аудандарына су беру уақытша тоқтатылды.

Әкім орынбасарының айтуына қарағанда, жұмыс ауқымын тиянақты аяқтап шығу үшін кемінде жарты ай керек екен. Қала тұрғындарын ауыз сумен қамтамасыз ету үшін «Көкшетау су арнасы» коммуналдық кәсіпорны 48 мың текше метр мөлшерінде су қорын жасаған. Бұл су қала тұрғындарының біраз уақыт кәдесіне жарамақ. Шағалалы су қоймасынан алынатын су көлемі 46 мың текше метрге дейін ұлғайтылған. Әйтсе де, тұрғын үйлерде судың жетіспеушілігі байқалып отыр. Қа- ланың солтүстігіндегі және шығысындағы өнеркәсіп аумақтарында орналасқан бірқатар кәсіпорынды судан шектеу туралы шешім қабылданыпты.

Сергеевка су қоймасы – облыс орталығынан 200 шақырым қашықтықта. Мұншама үлкен су құбырының әр бөлігінде жөндеу жұмыстарын жүргізу ұзақ уақыт алмақ. Әкімдік тұрғындар мәселенің мәнісін жете түсініп, шыдамдылық танытса екен дейді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз