Еуразиялық даму банкінің (ЕАДБ) баспасөз қызметі мәліметінше, кредиторлар синдикатының Алматы халықаралық әуежайын кеңейту мен жаңғыртуды қаржыландыру шарттары туралы келісімге қол қойған. Кредиторлар тізіміне Еуразиялық даму банкі, Еуропалық Қайта Құру және даму банкі (ЕҚДБ), халықаралық қаржы корпорациясы және DEG неміс инвестициялық корпорациясы кіреді. ЕАДБ әуежайды 40 миллион долларға жаңғыртуды қаржыландырады, ал жобаның жалпы құны 780 миллион долларға бағаланған.
Әуежайдың жаңа иелері - TAV Kazakhstan компаниясы іске асыратын жаңғырту жобасына жаңа терминал салу және жұмыс істеп тұрған әуежайды жаңғырту, өткізу қабілетінің шектеулерін жою, маршруттарды дамыту, рейстер санын ұлғайту, клиенттерге қызмет көрсету сапасын арттыру бойынша жұмыстар кіреді.
«2019 жылы пандемияға дейін Алматы әуежайы әуе көлігімен тасымалдаудың жалпы санынан жолаушылардың 64 пайыздан астамын және жүктердің 84 пайыздан астамын тасымалдады. Оны жаңғырту бүкіл елдің орнықты экономикалық өсуіне және халықаралық көлік-логистикалық инфрақұрылымның дамуына ықпал ететін болады. Сонымен қатар, жоба 1000-нан аса жаңа жұмыс орындарын құруға мүмкіндік береді, бұл да жоғары әлеуметтік мәнге ие. Бұл жоба ЕАЭО кеңістігіндегі халықаралық даму банктері әріптестігінің артықшылықтарын көрсетеді», деді Еуразиялық даму банкі басқарма төрағасының орынбасары Амангелді Исенов.
Еске салайық, 2020 жылдың көктемінде TAV Airports Holding түрік холдингі Алматы халықаралық әуежайы акцияларының жүз пайызын сатып алған болатын. Мәміле 415 миллион долларға бағаланған.
