Парламент • 28 Қыркүйек, 2021

Қазақстан ТүркПА-ға төрағалық етеді

Түркі елінің атажұрты, қасиетті қарашаңырақ, киелі Түркістан қаласында Түркітілдес елдер Парламенттік Ассамблеясы Кеңесінің отырысы өтті. Онда Қазақстан ТүркПА-ға төрағалық етуді Әзербайжан елінен қабылдап алды, деп жазады Egemen.kz ҚР Парламенті Мәжілісінің баспасөз қызметіне сілтеме жасап.

Әсел САРҚЫТ

Суретті түсірген Ж.Жұмабеков

Мәжіліс Спикері Нұрлан Нығматулин халықаралық ұйымға төрағалық етуді ерекше құрметпен қабылдап алып, бұл біздің ел үшін үлкен мәртебе және зор жауапкершілік екенін алға тартты. Осы орайда Палата Спикері бауырлас әзірбайжан халқына шын жүректен алғыс білдірді.

«Түркі Кеңесінің отырысында Қазақстанның Тұңғыш Президенті, Елбасы, ТүркПА-ның негізін қалаушы, түркі Кеңесінің Құрметті Төрағасы Нұрсұлтан Назарбаев осы Кеңесті толықтай халықаралық ұйымға өзгерту туралы бастама көтерген болатын», деді Мәжіліс Төрағасы.

Палата Спикерінің айтуынша алдымызда қараша айында Ыстамбулда өтетін Түркі Кеңесінің кезекті отырысында Мемлекет басшылары тиісті шешім қабылдайды деп күтілуде. Сонымен қатар, егер сондай шешім қабылданса, Ассамблеяның атауын Түркі мемлекеттерінің Парламенттік Ассамблеясы деп өзгертуді ұсынатынына тоқталды.

«Алдағы бір жыл ішінде біз қалыптасқан мұрагерлікті сақтай отырып, елдеріміздің арасындағы байланысты одан әрі тереңдету, парламентаралық ынтымақтастықты нығайту, Ассамблея аясын кеңейту және халықаралық беделін арттыру жолында бірлесе еңбек ететін боламыз», деді Нұрлан Нығматулин.

Сонымен қатар, Мәжіліс Төрағасы биылғы жыл Қазақстан, Әзербайжан және Қырғызстан үшін ерекше тарихи кезең екенін, мемлекеттеріміздің тәуелсіздігіне 30 жыл толатынын атап өтті.

«Бұл уақыттың ішінде елдеріміз көптеген қиындықтарды жеңіп қана қоймай, үлкен табыстарға, айтулы жетістіктерге жетті. Оған біздің Парламенттік Ассамблеяның да қосып жатқан үлесі өте зор», деді Нұрлан Нығматулин.

Айта кету керек, ұйым құрылған күннен бастап, өзара іс-қимылды күшейтуге, мемлекетаралық байланысты нығайтуға, елдеріміздің халықаралық беделін арттыруға, аймақтық қауіпсіздікті қамтамасыз етуге үлкен үлес қосып келеді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз