Биыл «Ақиқат» ұлттық қоғамдық-саяси журналының ақпараттық кеңістікке шыққанына ғасыр толды. Қастерлі құндылықтарымызды насихаттап, елдігімізді дәріптеп, ұлттық көзқарасты қалыптастыруды мақсат тұтқан басылымның мерейлі белесі – қалың қазақтың мерекесі. Бүгінде Тәуелсіз Қазақстанның ақпараттық кеңістігінде өзіндік брэндке айналған журналдың жемісті еңбегін ойлы оқырман жоғары бағалайды.
«Кемел ойдың керуені» атты көрмеде «Ақиқат» журналының негізі қаланған күннен бастап бүгінгі күнге дейінгі қызметінің даму көкжиегінен сыр шертетін тарихи-танымдық, мұрағаттық-ақпараттық деректер мен фотосуреттер ұсынылған.
Журналдың шығу тарихы 1921 жылы 15 қыркүйектен бастау алады. Сол кезде Орынбор қаласында «Қызыл Қазақстан» («Красный Казахстан») атты бірінші нөмірі жарық көрді. Әр жылдары басылым «Ауыл коммунисі», «Коммунист», «Қазақстан большевигі», «Қазақстан коммунисі» деп аталып келді. Тәуелсіздік алғаннан кейін журнал көрнекті мемлекет және қоғам қайраткері, журналдың бас редакторы Камал Смайыловтың идеясымен «Ақиқат» деп өзгертілді.
Тарихы терең басылымның тұңғыш редакторы – Абдолла Асылбеков. Журналды әр жылдары Смағұл Сәдуақасов, Ерғали Алдоңғаров, Мырзағұл Атаниязов, Нәзипа Құлжанова, Нығмет Нұрмақов, Сұлтан Сегізбаев, Хамза Жүсіпбеков, Құрманбек Сағындықов, Кәкімжан Қазыбаев сынды белгілі тұлғалар басқарған.
Басылым бетінде М.Әуезов, С.Сейфуллин, Б.Майлин және т.б. ақын-жазушылардың шығармалары тұңғыш рет жарық көрген. Тәуелсіздік жылдарында журналға Камал Смайылов, Сарбас Ақтаев, Нұрмахан Оразбек, Жұмабек Кенжалин бастаған бас редакторлар жетекшілік етіп, басылымның өн бойына азаттығымыздың айшықты рухын дарытып, мазмұндық тұрғыдан жаңаша серпін әкелді. Журналдың «Қызыл Қазақстаннан» «Ақиқатқа» дейінгі жүріп өткен жолдары ұлтымыздың бір ғасырға жуық тарихынан сыр шертеді. Әрбір айдардағы талдамалық мақалалар, ғылыми сараптамалар құнды деректерден тұрады. Журнал бетінде тарих, ұлттық мүдде, қазақ қоғамының дамуы, мемлекетшілдік сананы қалыптастыру, дін мен діл, ұлттық болмыс, жаһандық мәселелер қозғалып, маңызды тақырыптар ой-сана тұрғысынан жан-жақты талданып, оқырманға жол тартады. Соның ішінде саясат, тарих, философия, экономика, мәдениет және филология салаларындағы өзекті тақырыптар қамтылып келеді.
«Кемел ойдың керуені» көрмесінің салтанатты ашылу рәсімінде Мемлекеттік орталық музей директорының орынбасары – Бибігүл Дандығараева, «Қазақ газеттері» ЖШС директоры – Шәмшидин Паттеев, «Ақиқат» журналының бас редакторы Дәуіржан Төлебаев құттықтау сөз сөйледі. Сөз сөйлеушілер журнал редакциясын көрменің ашылуымен құттықтап, журналдың қоғам үшін ұлттық тарих пен мәдениетті насихаттау ісіндегі маңыздылығын атап өтті.
АЛМАТЫ
