Петропавл құрылыс материалдары зауыты 2007 жылдан бері ресейлік кәсіпорындармен тығыз экономикалық қарым-қатынаста жұмыс істеп келеді. Соған орай шетелдік әріптестеріміз тарапынан құрылыс индустриясының нарық талаптарына жауап беретін құрылыс өнімдері мен бұйымдарына деген сұраныстың өскені байқалады. Жаңа технологияларды енгізу, құрылыс материалдарының тиімді және экологиялық таза заманауи үлгілерін шығару екі жаққа да өте тиімді екені байқалып, біріккен кәсіпорын құру ынтымағына және интеграциялық үдерістердің дамуына кең жол ашылды.
Құрылыс материалдары нарығындағы сұранысты саралай отырып, зауыт су қысымына шыдамды полиэтилен құбырларын, «Монтеррей» және «Каскад» металл жабындыларын, профилен төсенділерін, сэндвич-панельдерін де шығара бастады. Тапсырыс беруші тарап полиэтилен құбырларын көптеген себептер бойынша таңдайды. Солардың ішінде бастысы – олардың ұзақ мерзімде пайдаланылуы, суық сумен қамтамасыз ету жүйесіндегі кепілді қызмет мерзімінің 50 жылдан кем еместігі. Полиэтиленнен жасалған құбыр түрлі көлемдегі қосындылар түрінде ауыз суға қосылатын хлорға және қышқылдарға төзімді. Өткізу қабілеттілігі пайдаланылған кезде құбыр бойынша су айдауға кететін қуат шығындарын 5-8 пайызға төмендетуге мүмкіндік береді. Металл жабындыларының басты артықшылығы ретінде олардың дәстүрлі өсімдердің барлық артықшылығына ие бола отырып, анағұрлым сәнді көрінетінін, ал жинауының өте қарапайымдылығын, металл жабындылар құрылғыларының жеңілдігін, пайдалануға қолайлылығы мен қарапайымдылығын шекаралық аймақтарда орналасқан Түмен, Омбы, Қорған облыстарының кәсіпкерлері жоғары бағалап отыр.
Шынында да, профилен төсенді – әмбебап материал, ол белдік құрылғылардың үстін жабу үшін қалай қолданылса, тұрғын үйлер, өндірістік және тұрмыстық ғимараттар құрылыстары кезінде қабырғалар мен төбелерді жабуға да әбден ыңғайлы. Сэндвич-панельдер тұрғын үйлердегі сияқты, өнеркәсіптік құрылыста да үлкен сұранысқа ие. Оның теп-тегіс беті қосымша өңдеуді талап етпейді, сэндвич-панельдердің ылғал тартқыштығы төмен және жақсы жылу сақтағыш қасиеті бар. Сондықтан ол, тіпті, қиыр солтүстік өңірлерде құрылыс жүргізуге мүмкіндік береді. Бірден боялып шығарылатындықтан, ғимараттың әрлеп-сырлау жұмыстарының құны да біршама төмен.
Төрт жылдан бері құрылымдық жылу сақтағыш панельдер өндірісін сериялап шығаруды ұйымдастырып келеміз. Бұл тәжірибемізге де алыс-жақын шетелдердегі әріптестеріміз ерекше қызығушылық танытты. Сірә, тұрғын үйлер және жеңіл коммерциялық ғимараттар қабырғаларының тез тұрғызылатыны, майысқыш беріктік шегі көрсеткіштері бойынша құрылымдық тұтастығының құрылыстық ағаштан салынған стандартты үйден анағұрлым асып түсетін артықшылықтары назарларын аударса керек. 2010 жылдан бері жеті жоба пайдалануға беріліп, жерасты және жерүсті болат, полиэтилен құбырлар тарту технологиялары жетіле түсті.
Бүгінде кәсіпорында әртүрлі құрылыс материалдарын шығаратын он сегіз технологиялық желі орнатылып, сапа менеджменті жүйесі бойынша жұмыс істейді. Мұның өзі коттедждік құрылыстар, жылдам тұрғызылатын ғимараттар және арнайы ғимараттар үшін құрылыс материалдарына қойылатын ерекше талаптарды сақтауға көмектеседі. Шығарылатын өнімдерге тұтынушылардың жоғары қызығушылығы мен сұранысына әртүрлі байқауларда жеңіп алған сертификаттар, дипломдар, алғыс хаттар айғақ бола алады. Олардың ішінде «Алтын ягуар» халықаралық сыйлығына ие болғанымызды айтсақ та жеткілікті. Жетекші өнеркәсіпшілерден, бизнесмендерден, бюджет қызметкерлерінен, журналистерден құралған іскер топтар ассамблеясы зауыттың шаруашылық-ауыз суымен қамтамасыз ететін қысымға шыдамды полиэтилен құбырларына «Жоғары сынамақ» сапа белгісін берді. Сапаны арттыру және өнім түрлерін көбейту – Елбасымыздың биылғы Жолдауында қойылған басты талаптардың бірі. Еңбеккерлеріміз тренингтер мен семинарларға жүйелі қатысады. Олардың тәжірибелерін жетілдіру, біліктілігін арттыру ұдайы назарымызда. Шетелдік әріптестерімізден де үйренеріміз көп.
Елімізде құрылыс индустриясы өркендеп, қанат жайып келеді. Біз өнімдерімізді ішкі нарықпен шектелмей, осы заманғы бәсекеге ыңғайлана отырып алыс-жақын шетелдерге жөнелтуді мақсат етіп отырмыз. Бұл орайда, ресейліктер негізгі тұтынушылар болып табылады. Бүгінде сыртқы нарыққа бағдарланған әртүрлі маркалы полиэтилен құбырлары Ресей Федерациясының Қорған, Омбы және Новосібір облыстарына жөнелтілуде.
Александр КОНДРАТОВ,
«Петропавл құрылыс материалдары зауыты»
ЖШС-нің бас директоры.
Солтүстік Қазақстан облысы.