Елорда • 05 Қазан, 2021

Елорда газбен қашан толық қамтылады?

62 рет көрсетілді

Нұр-Сұлтан қаласының әкімі Алтай Көлгінов 2023 жылға қарай елорда толықтай газбен қамтылатынын айтты, деп жазады Egemen.kz.


Әкімнің сөзінше, қазіргі күні «Көктал-1», «Көктал-2», «Оңтүстік шығыс», «Промышленный» және «Агроқалашық» шағын аудандарына газ құбырының 645 шақырымы тартылған.

«Қазір ол жерлерге инженерлік желілер жүргізіліп жатыр. Сарыарқа ауданының 100 үйі газға қосылып үлгерді. Тұрғындар өте қуанышты. Әрине, газ бен көмірдің айырмашылығы үлкен ғой. Жоспар бойынша 2023 жылға дейін елорда толықтай газдандырылады», деді әкім.

Көлгінов газ тарифі мәселесіне де тоқталды. Оның айтуынша, әкімдік тұрғындар шағымын назарға алды.

«Бастапқыда тариф 45 теңге болды. Кейін 60 теңге болып бекітілді, артынша қайтадан 45 теңгеге түсті. Қазір тариф 37 теңге. Бұл тиімді баға»,  деді ол.

Көлгіновтың айтуынша, қазір қалада газбен жұмыс істейтін ТЭЦ-3 құрылысы жүргізіліп жатыр. Қуаты 420 Гкал ТЭЦ қолданыстағы екі жылу орталығына түсіп отырған салмақты біраз жеңілдетеді.

«Алайда қаланың өсу қарқынына қарасақ, бұл да жеткіліксіз болады. Сондықтан қуаты 600 Гкалдық газ қазандықтарын салатын боламыз. Олар Жағалау және жаңа вокзал ауданында салынады», деді ол.

 

Соңғы жаңалықтар

Ұқсас жаңалықтар