Күрес • 08 Қазан, 2021

Жақанша мен Шадукаев қола жүлдеден әлі де үміттерін үзген жоқ

Скандинавия түбегінде өтіп жатқан әлем чемпионатында грек-рим күресі шеберлері кеше өздерінің алғашқы бәсекелерін өткізді. Төрт салмақ дәрежесі бойынша өткен сайыстар аса шиеленісті тартысқа толы болды.

Ғалым СҮЛЕЙМЕН

Грек-рим күресі шеберлері арасындағы жарыстың алғашқы күні төрт салмақ дәрежесі бойынша бәсекелер өтті. Бірақ бұл жолы да балуандарымыз сенім үдесінен шыға алмады. Қаһарман Қисметов (72 кило), Темірлан Шадукаев (77 кило) және Мақсат Ережепов (82 кило) тұсаукесер кездесулерінде жеңілістің кермек дәмін татты. Қаһарман Еуропа біріншілігінің қола жүлдегері, литвалық Криступас Шлейваға (1:10), Темірлан Олимпиада мен әлемнің екі дүркін чемпионы, ресейлік Роман Власовқа (0:11) және Мақсат әлем чемпионатының күміс жүлдегері, швециялық Алекс Кессидиске (3:9) есе жіберді. Таблодағы есепке қарсаңыздар, жерлестеріміздің ешқайсы қарсыластарына жарытып қарсылық көрсете алмағанын аңғару қиын емес.

Қорлан Жақанша (55 кило) алғашқы айналымда біраз жылдан бері Бразилияның туы астында өнер көрсетіп жүрген қандасымыз Марат Ғариповпен күш сынасты. Бұл тартыс 9:0 есебімен Қорланның пайдасынан шешілді. Бірақ келесі кездесуде Еуропа чемпионы, әлем кубогының иегері, ресейлік Эмин Сефершаев қазақ балуанына сан соқтырып кетті.

Сөйтіп, біздің балуандарға өздері есе жіберген қарсыластарының тілеуін тілеуден басқа амалы қалмады. Егер олар ақтық сынға дейін алқынбай жетсе, жерлестерімізге жарысты одан әрі жалғастыруға мүмкіндік туындайды. Яғни, олар жұбаныш бәсекесіне қатысу құқығына ие болады. Ол жерде сүрінбесе, қола медальға да қол жеткізуге болады. Бірақ «өзгеге қараған күнің құрсын» демекші, Қисметов пен Ережеповке тізе бүктірген жігіттердің өздері де көп ұзамай жеңілістің кермек дәмін татты. Ендігі үміт – Жақанша мен Шадукаевта еді. Өйткені, олардың алдын ораған Ресейдің қос саңлағы финалға шықты.

Күннің маңызды және өзекті жаңалықтарын «Егемен Қазақстан» телеграм каналынан оқыңыз