Театр • 13 Қазан, 2021

Театрлар тартысқа түсті

Арқа төсінің мәдени өмірі айрықша оқиғаның куәсі болды. Кеншілер астанасында белгілі театр сыншысы, профессор Әшірбек Сығай атындағы республикалық театр фестивалі тұңғыш рет тұсауын кесті. Аталған өнер байқауын Қазақстан Тәуелсіздігінің 30 жылдығына арналған мәдени іс-шаралар ішіндегі ең ірісі деп айтуға әбден болады.

Қайрат Әбілда

Фестивальге қатысуға өтінім берген 40 театрдың ішінен ұйымдастыру комитеті 15 ұжымды іріктеп алған екен. Олардың ішінде «Құлагер» спектаклімен қатысқалы отырған Алматы қаласының Ғабит Мүсірепов атындағы Қазақ мемлекеттік академиялық балалар мен жасөспірімдер театры, «Қыз Жібек» лиро-эпостық қойылымын ұсынған Әзірбайжан Мәмбетов атындағы Қазақ мемлекеттік драма және комедия театры, «Мен ішпеген у бар ма?» спектаклін алып келген Жезқазған қаласының Серәлі Қожамқұлов атындағы Қазақ музыкалық-драма театры және басқа да өнер ұжымдары бар.

Өнер байқауының салтанатты ашылу кешінде Қарағандыдағы Сәкен Сейфуллин атындағы қазақ драма театры венгр драматургі Ласло Дюрконың пьесасы бойынша қойылған «Электра» антикалық трагедиясының заманауи нұсқасын қазылар алқасы мен көрермендер назарына ұсынды.

Фестиваль қонағы, Қазақстанның халық әртісі Тұңғышбай Жаманқұлов байқауда бақ сынап жатқан өнер ұжымдары репертуарларының алуан түрлі екенін айтады.

– Мұнда классикадан бастап қазіргі заманғы драмаларға дейін бар. Осы спектакльдердің ерекшелігі ретінде оларды жас режиссерлердің қоюы деп сенімді түрде атап айтуға болады. Бұл Қазақстандағы театр режиссурасының өсіп келе жатқанын, оның болашағы бар екенін көрсетеді, – дейді мэтр.

Байқауда тартысқа түскен театрлардың бағасын Қазақстанның еңбек сіңірген қайраткері, профессор Еркін Жуасбек бастаған қазылар алқасы береді.

Ал қазылар алқасының төрағасы, театр сыншысы Амангелді Мұқан басты мақсат сын айту емес, қазіргі қазақ театры қай бағытта дамуы керектігін анықтау, жаңа театрды көру, пікір алмасу екендігін атап өтті.

– Әшірбек Сығай атындағы театр фестивалі Қазақстанда алғаш рет өтуде. Бүгінде жас режиссерлер шыға бастады, олар көбінесе классика негізінде әртүрлі жанрдағы заманауи спектакльдер қояды. Олардың өз идеялары мен өз көзқарастары бар, – дейді ол.

Фестиваль аясында шеберлік сабақтары мен семинарлар өтетінін де айта кеткен ләзім. Ал көрермен қауым байқау бағдарламасы бойынша ұсынылған спектакльдерді Қарағандыдағы С.Сейфуллин және К.Станиславский атындағы театрлардың сахналарынан 16 қазанға дейін тамашалай алады.

Өнер бәйгесінің соңына қарай жеңімпаз театр мен арнайы жүлделердің иегерлері анықталып, олар Әшірбек Сығай атындағы және оның шәкірттері тағайындаған сыйлықтармен марапатталатын болады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз