Фестивальға жас мемлекеттік қызметшілер мен ауданның белсенді жастарынан құралған 8 команда спорттық және туристік бағдарламалар бойынша өзара сайысқа түсті. Олардың қатарында Аманқарағай, Новонежин, Диев, Новоселов, Москалев ауылдық округтері мен Тимофеев ауылының жастар құрамалары бар.
Бағдарлама бойынша сайыскерлер туристік және спорттық кедергілерден өтіп, межелі нысанға бірінші болып жетуі шарт. Командалар орман ішіндегі ну жыныстан жол табу, өзен өткелінен су болмай өту, велосипедке мініп жылдамдық жарыстыру сияқты кезеңдерді бағындырып, мылтық атып нысанаға дәл тигізу, аяққа қап киіп жарысу, арқанмен өрмелеу сияқты бұқаралық спорт түрлері бойынша сынға түсті.
– Бұл жоба алғаш рет Әулиекөл ауданының әкімі Ерлан Теменовтің бастамасымен 2019 жылы ұйымдастырылған. Былтыр пандемияға байланысты өтпей қалды. Енді, міне, араға жыл салып тағы қолға алып отырмыз. Auliekol Jastar Fest қысқа уақыт ішінде аудан жастары асыға күтетін спорттық іс-шаралардың біріне айналды, – деді «Достық» кешенінің директоры Бибігүл Әбдірахманова.
Сайыс қорытындысы бойынша, аудан орталығы – Әулиекөл ауылының жастары жеңімпаз атанып, бас кубокты иеленді. Алайда фестивальға қатысқан командалардың ешқайсысы құр қол қайтқан жоқ. Кешен басшылығы жастардың бәріне Auliekol Jastar Fest деген белгісі бар естелік сыйлықтар мен арнайы дипломдар табыс етті.
